Azərbaycanda onkoloji yardım özəl tibb müəssisələrində də göstəriləcək

Azərbaycanda onkoloji tibbi yardımın göstərilməsi özəl tibb müəssisələrinə də şamil olunacaq. Bu, Milli Məclisin Səhiyyə komitəsinin iclasında müzakirəyə çıxarılan “Əhalinin sağlamlığının qorunması haqqında” və “Onkoloji yardım haqqında” qanunlara təklif edilən dəyişikliklərdə əksini tapıb.

Layihəyə əsasən, onkoloji yardım bundan sonra ixtisaslaşdırılmış dövlət tibb müəssisələri ilə yanaşı, “Lisenziyalar və icazələr haqqında” Qanuna uyğun olaraq müvafiq lisenziya almış özəl tibb müəssisələrində də (lisenziyanın əlavəsinə uyğun) həyata keçiriləcək.

Hazırda qüvvədə olan qanunvericiliyə görə, onkoloji xidmət yalnız ixtisaslaşmış dövlət müəssisələri tərəfindən göstərilir və Azərbaycan vətəndaşlarının müayinə və müalicəsi dövlət büdcəsi hesabına maliyyələşdirilir. Dövlət həmçinin onkoloji xəstələrin dispanserizasiyası, müalicə və reabilitasiyasını həyata keçirən müəssisələrin yaradılmasına və maddi-texniki bazasının gücləndirilməsinə təminat verir.

Müzakirələrdə bildirilib ki, “Əhalinin sağlamlığının qorunması haqqında” Qanunun 24-cü maddəsi pasiyentin öz razılığı ilə həkim və tibb müəssisəsi seçmək hüququnu təsbit etsə də, “Onkoloji yardım haqqında” Qanun bu seçimi faktiki olaraq yalnız dövlət müəssisələri ilə məhdudlaşdırır. Nəticədə, onkoloji xidmət göstərən özəl klinikaların fəaliyyəti lisenziyadan kənar hesab olunur və məsuliyyət yaradır.

Komitədə qeyd olunub ki, ölkədə onkoloji xəstələrin sayının çoxluğu və xidmətlərin yalnız dövlət büdcəsi hesabına göstərilməsi bir sıra vətəndaşların müalicə üçün xaricə üz tutmasına səbəb olur. Halbuki, Azərbaycanda müasir avadanlıqlarla təchiz edilmiş və ixtisaslı kadrları olan özəl tibb müəssisələri mövcuddur.

Dəyişikliklərin qəbul ediləcəyi təqdirdə, yalnız onkoloji yardım üzrə lisenziyaya malik özəl tibb müəssisələri bu xidməti göstərə biləcək. Bu isə pasiyentlərin dövlət və ya özəl tibb müəssisəsini sərbəst seçmək hüququnu təmin etməklə yanaşı, Azərbaycan vətəndaşları, əcnəbilər və vətəndaşlığı olmayan şəxslər üçün müalicə imkanlarını genişləndirəcək.

Gülnar Nazimqızı