Ermənistan qaz idxalında Azərbaycan marşrutunu nəzərdən keçirir

Ermənistan İran və Gürcüstan üzərindən enerji təchizatında yaranan logistika çətinlikləri fonunda qaz idxalı üçün alternativ marşrut kimi Azərbaycan ərazisindən keçən dəmir yolu xəttini nəzərdən keçirir. Bu barədə “Sputnik-Ermənistan” məlumat yayıb.

Məlumata görə, İranda daxili qeyri-sabitlik səbəbindən nəqliyyat və gömrük sistemlərində fasilələr, həmçinin hava şəraiti ilə əlaqədar Hərbi Gürcüstan yolunun vaxtaşırı bağlanması rəsmi Yerevanı yeni logistika imkanları axtarmağa vadar edib. Alternativlərdən biri Azərbaycan üzərindən daşımalar hesab olunur.

Ermənistanın İqtisadiyyat Nazirliyi bildirib ki, Azərbaycan marşrutu Gürcüstan–Rusiya sərhədindəki “Yuxarı Lars” keçid məntəqəsi və İran istiqamətinə alternativ kimi qiymətləndirilir. Bu çərçivədə mayeləşdirilmiş təbii qazın (LNG) idxalı imkanları da araşdırılır.

Erməni ekspertlər regionda iqtisadi münasibətlərin əməkdaşlıq prinsipləri əsasında qurulmasının vacibliyini vurğulayır, sənayenin bərpası və regional istehsal zəncirlərinə inteqrasiyanın əsas prioritet olduğunu bildirirlər.

Qeyd edək ki, sülh gündəliyi çərçivəsində 2025-ci ilin noyabrından Rusiya və Qazaxıstandan buğda Azərbaycan üzərindən Ermənistana daşınır, dekabr ayından isə Azərbaycandan Ermənistana neft məhsullarının ixracına başlanılıb.