Bakı-Astara dəmir yolu xətti 2028-ci ilə qədər modernizasiya ediləcək

Bakı-Astara dəmir yolu xəttində modernizasiya işləri 2028-ci ilə qədər tamamlanması planlaşdırılır. Bu barədə Rəqəmsal İnkişaf və Nəqliyyat Nazirliyinin müavini Rəhman Hümmətov məlumat verib.

Onun sözlərinə görə, modernizasiya işləri başa çatdıqdan sonra həmin istiqamətdə sərnişin daşımaları mümkün olacaq.

Hümmətov bildirib ki, Astara istiqamətində bəzi yolların mövcud vəziyyəti əlavə işlərin aparılmasını tələb edir. O, xüsusilə ötən ilin sonunda Rusiya ilə imzalanmış sazişi xatırladıb. Sazişdə “Şimal-Cənub” beynəlxalq nəqliyyat dəhlizinin inkişafı və mövcud xəttin modernizasiyası nəzərdə tutulub.

“İşləri başa çatdırmadan və təhlükəsizliyi tam təmin etmədən sərnişin daşımalarının bərpasını tərəfdar deyilik. 2028-ci ilə qədər yolun modernizasiyasını nəzərdə tuturuq və həmin dövrdə artıq sərnişindaşımanın bərpası mümkün olacaq. Yeganə məhdudiyyət yoldakı cari vəziyyətdir və təhlükəsizlik baxımından modernizasiya bitmədən sərnişin qatarlarının buraxılması arzuolunan deyil",  nazir müavini deyib. 

Bakı-Astara dəmir yolu xətti “Şimal-Cənub” beynəlxalq nəqliyyat dəhlizinin tərkib hissəsidir və regionda yük və sərnişin daşımalarının optimallaşdırılması üçün strateji əhəmiyyət daşıyır. Modernizasiya işləri xəttin təmiri, təhlükəsizlik standartlarının yüksəldilməsi və sərnişin xidmətlərinin bərpası istiqamətində həyata keçiriləcək.

Gülnar Nazimqızı