FHN fevralın 5-dək ölkədə kəskin hava şəraiti ilə bağlı əhaliyə xəbərdarlıq edib

Fövqəladə Hallar Nazirliyi (FHN) fevralın 5-dək ölkə ərazisində gözlənilən kəskin hava şəraiti ilə bağlı əhaliyə təhlükəsizlik tədbirlərinə ciddi əməl etməyi tövsiyə edib.

FHN-in məlumatına görə, Milli Hidrometeorologiya Xidmətinin proqnozlarına əsasən, bu müddət ərzində ölkənin ayrı-ayrı bölgələrində güclü külək, intensiv yağıntılar, qar və temperaturun kəskin aşağı enməsi gözlənilir.

Nazirlik əhalini xəbərdar edib ki, güclü külək zamanı yüngül konstruksiyalı və müvəqqəti tikililərdən, bina və reklam lövhələrinin yaxınlığından uzaq durmaq, elektrik dirəkləri, naqillər və hündür ağacların altında dayanmaq təhlükəlidir. Eyni zamanda, küləkli havada yanğınların söndürülməsində çətinliklər yarandığı üçün yanğın təhlükəsizliyi qaydalarına xüsusilə diqqət yetirilməlidir.

Soyuq hava şəraiti qaz və elektrik qızdırıcılarının istifadəsini artırdığı üçün, FHN əhalini yanğın və dəm qazı təhlükəsinə qarşı xəbərdar edib. Nazirlik nasaz, qeyri-standart və ya kustar üsulla hazırlanmış qızdırıcı cihazlardan istifadə etməməyi, elektrik şəbəkəsini həddindən artıq yükləməməyi və işlək qızdırıcı cihazları nəzarətsiz qoymamağı tövsiyə edib.

Xüsusilə dağlıq ərazilərdə yaşayan vətəndaşlar şaxtalı və qarlı havada mümkün qədər hərəkət etməməli, əgər hərəkət zərurəti yaranarsa, yaxınlarını istiqamət barədə məlumatlandırmalı, avtomobilin texniki göstəricilərini və yanacaq ehtiyatını yoxlamalıdırlar. Qar uçqunu riski olan ərazilərdən, dik yamaclardan uzaq durmaq və günəş batmamış evə qayıtmaq da tövsiyə olunur.