Əliyev: Azərbaycan “Visa” ilə əməkdaşlığı genişləndirməyi planlaşdırır

Hökumət qurumları ölkənin “Visa” şirkəti ilə əməkdaşlığını yüksək qiymətləndirir və bu tərəfdaşlıq növbəti illərdə də genişləndiriləcək. Bunu Azərbaycan Prezidenti İlham Əliyev ABŞ Ticarət Palatasının beynəlxalq üzvlərlə əlaqələr, Yaxın Şərq və Türkiyə üzrə baş vitse-prezidenti Kuş Çoksinin rəhbərlik etdiyi nümayəndə heyəti ilə görüşdə deyib.

“‘Visa’ şirkəti ilə çox məhsuldar əməkdaşlıq barədə hökumət qurumlarımızdan məlumat almışam və biz bundan məmnunuq,” –  dövlət başçısı bildirib.

Prezident qeyd edib ki, “Visa” Azərbaycanda İqtisadiyyat Nazirliyi, Mərkəzi Bank, Rəqəmsal İnkişaf və Nəqliyyat Nazirliyi, eləcə də digər qurumlarla birgə fəaliyyət göstərir və tərəflər müasirləşmə və gündəlik xidmətlərin sadələşdirilməsi istiqamətində birgə işi davam etdirəcəklər.

“Biz insanların gündəlik həyatını daha rahat etmək üçün gələn illərdə ‘Visa’ ilə sıx işləyəcəyik,” – Əliyev vurğulayıb.

“Visa”nın MDB və Cənubi və Şərqi Avropa üzrə baş vitse-prezidenti Kristina Doros bildirib ki, şirkət artıq 30 ildir Azərbaycanda yerli banklarla əməkdaşlıq edir və ölkədə təhlükəsiz, inklüziv və qabaqcıl ödəniş sistemlərinin inkişafına yönəlmiş layihələr həyata keçirir.

Onun sözlərinə görə, “Visa” Azərbaycan hökuməti ilə “Azərbaycan 2030” strategiyası çərçivəsində milli prioritetlər üzrə əməkdaşlığa xüsusi önəm verir.

X.Əliyeva