Azərbaycan nümayəndə heyəti quru sərhədlə Ermənistana keçib - Dəyirmi masa olacaq

13–14 fevral 2026-cı il tarixlərində Ermənistanda “Sülh Körpüsü” təşəbbüsü çərçivəsində Ermənistan və Azərbaycanın vətəndaş cəmiyyətlərinin nümayəndələrini bir araya gətirən ikitərəfli dəyirmi masa keçirilir. Bu barədə Ermənistan mətbuatı yazıb. 

Təşəbbüsün əsas iştirakçıları ilə yanaşı, tədbirdə hər iki tərəfdən geniş nümayəndə heyəti iştirak edir. Azərbaycan nümayəndə heyəti bütün müvafiq prosedurları yerinə yetirdikdən sonra quru sərhədindən keçərək Ermənistana çatıb.

Bu, iki ölkə arasında etimadın möhkəmləndirilməsi istiqamətində mühüm praktik addım kimi qiymətləndirilir.

Müzakirələr zamanı tərəflər 8 avqust 2025-ci ildə Vaşinqton Zirvə Görüşü zamanı təsdiqlənmiş sülh gündəliyindən irəli gələn prosesləri nəzərdən keçirəcəklər. Sessiyalar çərçivəsində aşağıdakı mövzular müzakirə olunur:

Regional təhlükəsizlik arxitekturasının inkişafı, sülhün sosial və iqtisadi faydaları ,cəmiyyətlərarası münasibətlərə dair ictimai rəy, iqtisadi əməkdaşlıq perspektivləri, vətəndaş cəmiyyətinin qarşılıqlı anlaşma və etimadın artırılmasındakı rolu

Ermənistan tərəfindən iştirakçılar

Ermənistan nümayəndə heyətinə müxtəlif analitik mərkəzlərin, media qurumlarının və qeyri-hökumət təşkilatlarının təmsilçiləri daxildir. Onların sırasında Ermənistan Şurasının milli koordinatoru Areq Koçinyan, Yerevan Mətbuat Klubunun fəxri prezidenti Boris Navasardyan, Demokratiyanın İnkişafı Fondunun direktoru Naira Sultanyan, JAMnews-un Ermənistan üzrə ölkə direktoru Naira Martikyan, Orbeli Mərkəzinin regional siyasət üzrə eksperti Armen Petrosyan və digər ictimai-siyasi xadimlər yer alır.

Azərbaycan tərəfindən iştirakçılar

Azərbaycan nümayəndə heyətində isə Cənubi Qafqaz Tədqiqat Mərkəzinin direktoru Fərhad Məmmədov, Topçubaşov Mərkəzinin direktoru Rusif Hüseynov, 1news.az-ın baş redaktoru Kəmalə Məmmədova, Milli QHT Forumunun sədri Ramil İskəndərli, Beynəlxalq Münasibətlərin Təhlili Mərkəzinin nümayəndəsi Fuad Abdullayev, TREND agentliyinin baş redaktoru Emin Əliyev, CBC telekanalının təmsilçiləri və digər ekspertlər iştirak edirlər.

Tədbir iki ölkə arasında rəsmi danışıqlarla paralel olaraq ictimai diplomatiya kanallarının da fəallaşdığını göstərir. 

Gülnar Nazimqızı