AQTA Ramazan ayında düzgün qidalanma ilə bağlı məlumat yayıb

Azərbaycan Qida Təhlükəsizliyi Agentliyi Ramazan ayında düzgün qidalanma ilə bağlı tövsiyələr açıqlayıb.

Qurum bu dövrdə su balansının qorunmasını əsas prioritet kimi göstərib. Bildirilib ki, iftarla imsak arasında kifayət qədər su içmək və maye tərkibli qidalara üstünlük vermək susuzlaşmanın qarşısını alır, orucun isə ilıq su ilə açılması daha məqsədəuyğundur.

Agentlik imsakın vacibliyini vurğulayaraq səhər qidalanmasının enerji və su balansını qoruduğunu qeyd edib. Bu zaman yulaf, düyü, bulqur, yumurta və pendir kimi qidalar, həmçinin tərəvəz və meyvələr tövsiyə olunur.

AQTA iftar zamanı qidalanmanın tələsmədən aparılmasını, əvvəlcə su və yüngül qidalar qəbul etməyi, sonra əsas yeməyə keçməyi məsləhət görür. Şorba kimi sulu yeməklərlə başlamaq, çox yağlı və qızardılmış qidalardan uzaq durmaq tövsiyə edilir. Fermentləşdirilmiş süd məhsullarının həzmi yaxşılaşdırdığı da qeyd olunub.

Qurum iftardan sonra qidalanmanı mərhələli şəkildə, kiçik porsiyalarla aparmağı, yüngül fiziki aktivliyi və yuxu rejiminə diqqəti də tövsiyə edir.

Azərbaycanda Ramazan ayı fevralın 19-da başlayır.