Azərbaycanda at xəstəliklərindən azad zonaların yaradılmasına başlanılıb

Azərbaycanda idman atlarının beynəlxalq yarışlarda, xüsusilə Avropa turnirlərində fasiləsiz iştirakını təmin etmək məqsədilə at xəstəliklərindən azad zonaların yaradılması istiqamətində işlərə başlanılıb.

Bu barədə Azərbaycan Respublikasının Qida Təhlükəsizliyi Agentliyi məlumat yayıb. Bildirilib ki, Avropa ölkələri atların idxalı zamanı ciddi epizootik və biotəhlükəsizlik tələbləri tətbiq edir və bu standartlar Ümumdünya Heyvan Sağlamlığı Təşkilatı tərəfindən müəyyən edilir.

Mövcud mexanizmlər tam uyğunlaşdırılmadıqda idman atlarının xaricə daşınması zamanı əlavə prosedurlar və məhdudiyyətlər yarana bilər. Bu səbəbdən ölkədə “at xəstəliklərindən azad zona” və ya “kompartment” modelinin tətbiqi planlaşdırılır.

Mövzu ilə bağlı keçirilən görüşdə AQTA ilə yanaşı Kənd Təsərrüfatı Nazirliyi, Aqrar Xidmətlər Agentliyi, Azərbaycan Atçılıq Federasiyası və beynəlxalq ekspertlər iştirak ediblər.

AQTA sədrinin müavini Balarəhim Quliyev bildirib ki, müvafiq statusun əldə olunması üçün obyektlərdə beynəlxalq baytarlıq və biotəhlükəsizlik standartlarına uyğun infrastruktur yaradılmalı, idman atlarının hərəkətinə xüsusi nəzarət sistemi tətbiq edilməlidir.

Tələblər yerinə yetirildikdən sonra beynəlxalq təşkilata rəsmi müraciət olunacaq və obyektlərin azad zona kimi tanınması mümkün olacaq. Bu status idman atlarının yarış keçirilən ölkələrə daha operativ və məhdudiyyətsiz daşınmasına imkan verəcək.

Layihənin at xəstəlikləri riskini azaltmaqla yanaşı, Azərbaycanın beynəlxalq atçılıq yarışlarında təmsilçiliyini gücləndirəcəyi gözlənilir.