Prezident: 2032-ci ilə qədər alternativ enerji mənbələrindən 6-8 giqavat enerji əldə olunacaq

Azərbaycan Prezidenti İlham Əliyev Cənub Qaz Dəhlizi Məşvərət Şurası çərçivəsində nazirlərin 12-ci və Yaşıl Enerji Məşvərət Şurası çərçivəsində nazirlərin 4-cü iclaslarında çıxışı zamanı ölkənin enerji strategiyasını açıqlayıb.

Dövlət başçısı bildirib ki, 2032-ci ilə qədər alternativ enerji mənbələrindən 6-8 giqavat elektrik enerjisi əldə etmək planlaşdırılır. İlham Əliyev əlavə edib ki, bu enerji yalnız daxili istehlak üçün deyil, həm də ixrac məqsədilə istifadə olunacaq və elektrik enerjisi istehsalında indiki təbii qazdan asılılığı azaltmaq üçün daxili tələbat qarşılanacaq.

Prezident həmçinin vurğulayıb ki, bu təşəbbüs kommunikasiya sektoru, süni intellekt və data mərkəzləri ilə bağlı planları da əhatə edir, həmçinin artan iqtisadiyyat və sənaye üçün əlverişli şəraitin yaradılmasına xidmət edəcək.