Nazir: Sürətləndirilmiş enerji keçidi qlobal enerji təhlükəsizliyi üçün risk yarada bilər

Lazımi hazırlıq olmadan sürətləndirilmiş enerji keçidi qlobal enerji təhlükəsizliyi üçün risklər yarada bilər. Report bu barədə energetika naziri Pərviz Şahbazova istinadla  yazıb.

Onun sözlərinə görə, hazırda dünya iqtisadiyyatı təxminən 80% karbohidrogenlərdən asılıdır və bu struktur ciddi dəyişməyib. Eyni zamanda, qlobal enerji tələbi hər il təxminən 3,5% artır.

Şahbazov qeyd edib ki, bərpa olunan enerji sektorunda artım sürətlənib və ötən il bu artım 15,5% təşkil edib, lakin bu dinamika karbohidrogenləri əvəz etmir, yalnız ümumi enerji balansını tamamlayır.

“Bu, əvəzetmə deyil, daha çox artan enerji tələbatının qarşılanmasına əlavədir,” – nazir bildirib.

O vurğulayıb ki, enerji keçidi çərçivəsində düşünülməmiş qərarlar, xüsusilə karbohidrogen sektoruna investisiyaların azalması enerji təhlükəsizliyi problemlərinə gətirib çıxara bilər.

Nazirin sözlərinə görə, enerji siyasətində bütün mənbələrin nəzərə alınması vacibdir və daha tarazlı yanaşma ölkələrin enerji müstəqilliyini gücləndirə bilər.