Qəzaya uğrayan təyyarənin qara qutusu açıldı

Rusiyada Dövlətlərarası Aviasiya Komitəsi bazar günü Kazanda qəzaya uğramış təyyarənin qara qutusunda hasil olunmuş ilkin məlumatları ictimaiyyətə açıqlayıb.Anspress xəbər verir ki, deşifrələmədən sonra bəlli olub ki, Boinq 737-nin ekipajı təyyarəni mexaniki rejimdə endirib. Mühərriklər isə uçuş zolağı ilə təmas anına kimi işlək vəziyyətdə olub. Rusiyanın Fövqaladə halları Nazirliyinin əməkdaşları 50 nəfərin həyatına son qoymuş qəza yerində əsas işləri yekunlaşdırsa da, göyərtə danışıqlarını qeydə almış kassetin axtarışları hələ də davam etdirilir. Mütəxəsislər aviaqəzanın baş vermə səbəbləri ətrafında araşdırmalar aparır. Müntəzəm olaraq qəzayla bağlı yeni təfərrüatlar ortaya çıxır. Məlum olub ki, Tatarıstan hava yolları şirkətinə məxsus sərnişin təyyarəsi eniş zolağına yaxınlaşan vaxt, aeroportun hava məkanına standard giriş həyata keçirə bilməyib və bunun üçün ikinci dövrəyə getməyi qərara alıb. Həmçinin aydınlaşıb ki, ekipajın rəhbəri qəza anına qədər, reallıqda təkrar dövrəyə getmə manevrini heç vaxt yerinə yetirməyib. Xatırladaq ki, Moskva-Kazan reysi ilə uçan Tatarıstan hava yolları şirkətinə məxsus Boinq 737 sərnişin təyyarəsi bazar günü Kazan aeroportuna enən zaman partlayıb. Aviaqəza 6 ekipaj üzvü və 44 sərnişinin, o cümlədən Tatarıstan prezidentinin oğlu və Tatırstan Federal Təhlükəsizlik Xidməti İdarəsinin rəhbərinin həyatına son qoyub. ANN.Az