Kayahan sabah dəfn olunacaq: Son vəsiyyəti açıqlandı

Ünlü sənətçi dəniz mənzərəsi olan məzarlıqda dəfn olunmasını vəsiyyət edib

Türkiyənin tanımış sənətçisi Kayahan sabah dəfn olunacaq. Müalicə aldığı xəstəxanada həyatını itirən sənətçi Kayahan, sabah keçiriləcək vida mərasiminin ardından son mənzilə yola salınacaq. Dahi sənətçinin ailəsi isə cənazəyə gələnlərdən əklil gətirməməyi xahiş edib. 

Qeyd edək ki, ağciyər xərçəngindən əziyyət çəkən 66 yaşlı sənətçi Kayahan uzun müddət müalicə aldığı "Acıbadem” Xəstəxanasında dünyasını dəyişib. Sabah Türkiyə vaxtilə saat 10:30-da Camal Reşid Rey konsert salonunda mərhumla vida mərasimi olacaq. 

Mərasimin ardından sənətçinin cənazəsi Təşvikiyə məscidinə götürüləcək. Burada günorta namazının ardınca qılınacaq cənazə namazından sonra Kayahan, özünün vəsiyyət etdiyi kimi, dəniz mənzərəli məzarlıqda, Qanlıca Qəbiristanlığında dəfn ediləcək.

Kayahanın ailəsi isə cənazəyə gələnlərə əklil gətirməmələrini, bunun əvəzinə gülə çəkiləcək xərcin Mehmetcik Vəqfinə hədiyyə edilməsini istədikləri bildiriblər.