Ərdoğan: “PKK və İŞİD arasında heç bir fərq yoxdur, mübarizə davam edəcək”

"HDP bağlanmamalı, amma partiya rəhbərləri hər şeyin əvəzini ödəməlidirlər”.

Modern.az saytı xəbər verir ki, bu sözləri Türkiyə prezidenti Rəcəb Tayyib Ərdoğan Çin səfəri öncəsi hava limanında jurnalistlərə açıqlamasında deyib. O, terrorçu PKK-nın siyasi qanadı olan Xalqların Demokratik Partiyasının (HDP)  bağlanması təkliflərinə belə münasibət bildirib.

"Partiyanın bağlanılması doğru olmazdı. Amma partiya rəhbərləri bu işin əvəzini ödəməlidirlər. Terror təşkilatlarından dəstək aldıqlarını bildirənlər, "Biz arxamızı oraya-buraya dayayırıq” deyənlər bu ifadələrin cavabını verməlidirlər. Həmçinin,  partiyanı yönləndirənlər önəmlidir, biz onlara qarşı tədbir görməliyik. Bu məsələ ilə bağlı parlament öz qərarını verməli və onların toxunulmazlığı ləğv edilməlidir. Terrorçularla işbirliyinə gedənlər bunun cəzasını çəkməlidirlər”. 

Rəcəb Tayyib Ərdoğan Türkiyənin İŞİD və PKK terrorçularına qarşı mübarizədən geri çəkilməyəcəyini bildirib:

"Biz PKK və İŞİD arasında heç bir fərq görmürük. Hər ikisinə qarşıda mübarizəni davam etdirəcəyik”.