Türkiyə ilə Rusiya arasında qaz “müharibəsi” böyüdü

Türkiyə "Türk axını” enerji layihəsinin həyata keçirilməsinin yubadılması ilə bağlı rəsmi açıqlama verib.

Modern.az saytı "Anadolu” agentliyinə istinadən xəbər verir ki, Türkiyənin Energetika və Təbii Qaynaqlar naziri Taner Yıldız gecikmənin Rusiyadan qaynaqlandığını bəyan edib.  

Onun sözlərinə görə Rusiya "Türk axını” qaz-boru kəmərinin marşrutun koordinatlarını verməkdə gecikir.  Nazir bildirib ki, tərəflər arasında imzalanması planlaşdırılan sənədlərin hazırkı vəziyyətdə parlamentdə gündəmə gəlməsi çətin məsələdir.   O qeyd edib ki, Rusiya 2015-ci ilin yanvar ayının 1-dən Türkiyəyə satdığı qazın qiymətinin endirəcəyini bəyan etsə də, bu sənəd imzalanmayıb

"Hər ölkənin öz fərqli işləri olur. Düşünürəm ki, ona görə də görə də bu məsələyə vaxt ayıra bilməyiblər. Hal-hazırda qiymətin endirilməsi ilə bağlı sənədi imzalamamışıq”   Taner Yıldız deyib ki, Moskva boru xəttinin keçəcəyi ərazilərin 265 kilometrliyinin koordinatlarını müəyyənləşdirməkdə ləngiyir.

"10 iyuna qədər müəyyənləşdirilməmiş bir koordinatın icazəsi də verilməz. Çünki Türkiyənin hara icazə verəcəyini bilməyi lazımdır”.  

Rusiya prezidenti Vladimir Putin ötən il dekabrın 1-də Ankaraya səfəri zamanı prezident Rəcəb Tayyib Ərdoğanla görüşündə "Cənub axını” layihəsinin dayandırıldığını və "Türk axını” enerji layihəsinin işə başlayacağını bəyan etmişdi.  

"Türk axını” reallaşacağı təqdirdə, Avropanın enerji xəritəsində mühüm dəyişikliklər olacağı gözlənilirdi. Lakin Rusiya ilə Türkiyə arasında aparılan danışıqlar düyünə düşdüyündən hələlik, bu layihənin gələcəyi sual altına düşür. 

Belə bir vaxtda isə isə  "Qazprom"la Almaniyanın "Wintershall" şirkəti arasında Baltik dənizinin dibindən keçən "Şimal axını" qaz kəmərinin buraxılış gücünün artırılmasına dair memorandum imzalanıb. Bu isə Türkiyənin "Türk axını"nda irəli sürdüyü şərtlərin ağır olmasına görə Rusiya tərəfinin adekvat addımları kimi dəyərləndirilir.

Bəzi ekspertlər bildirir ki, "Türk axını” Azərbaycan qazının Avropaya ixrac edilməsini nəzərdə tutan və əsasını TANAP və TAP kəmərləri təşkil edən "Cənub qaz dəhlizi”nə rəqibdir.