Tanınmış isveçrəli tennisçi Roje Federer ATP Tour(Association of Tennis Professionals) və Grand Slam yarışlarını tərk etdiyini açıqlayıb. Bu barədə CNN məlumat yayıb.

Roje Federer kariyerasının sonunun gəldiyini öz rəsmi "İnstagram” hesabında da bildirib.

"41 yaşım var. 24 il ərzində 1500-dən çox oyun keçirmişəm. Tennis mənə xəyal etdiyimdən daha səxavətlə yanaşdı və indi mən başa düşməliyəm ki, artıq rəqabətli karyeramın sonudur”, – 20 dəfə  "Böyük Dəbilqə" qalibi olmuş Federer İnstagram səhifəsində yazıb.

Federerin karyerasının son bir neçə ili bir sıra zədələrlə yadda qalıb. O, 2020-ci ildə iki diz əməliyyatı keçirib.

Federer həmçinin son bir neçə ildə üzləşdiyi uğursuzluqlardan da danışıb.

"Bir çoxlarınızın bildiyi kimi, son üç ildə xəsarətlər və əməliyyatlar kimi çətinliklərlə üzləşdim. Mən tam rəqabət formasına qayıtmaq üçün çox çalışmışam. Amma  bədənimin imkanlarını və məhdudiyyətlərini də bilirəm və onun mənə verdiyi mesaj son vaxtlarda aydın oldu”, - Roje Federer deyib.

Federerin uzun karyerası 22 dəfə "Böyük dəbilqə" qalibi olan ispaniyalı tennisçi Rafael Nadal və  21 dəfə "Böyük dəbilqə" qalibi olmuş serbiyalı  tennisçi Novak Cokoviçin karyerası ilə üst-üstə düşür.

Federer rəqiblərinə təşəkkür edib.

"Kortdakı rəqiblərimə də təşəkkür etmək istəyirəm. Mənə heç vaxt unuda bilməyəcəyim çoxlu epik matçlar oynamaq nəsib oldu. Biz ədalətli, ehtiras və intensivliklə mübarizə apardıq və mən həmişə oyunun tarixinə hörmətlə yanaşmağa çalışmışam. Mən özümü son dərəcə minnətdar hiss edirəm”, - Roje Federer deyib.

Rafael Nadal "Twitter”-də böyük rəqibi və dostu Federer ilə bağlı belə paylaşım edib.

"Əziz Rocer, dostum və rəqibim. Kaş ki, bu gün heç gəlməyəydi. Şəxsən mənim üçün və bütün dünyada idman üçün kədərli bir gündür. Bütün bu illəri sizinlə bölüşmək, həm meydançada, həm də meydançadan kənarda çox gözəl anlar yaşamaq həm zövq, həm də şərəf və iftixarır. Gələcəkdə birlikdə paylaşacağımız daha çox anlarımız olacaq. Birlikdə görəcəyimiz çox şey var. Londonda görüşəcəyik", - Rafael Nadal öz rəsmi "Twitter” hesabında deyib.

Bütün zamanların ən yaxşı iki oyunçusu ilə birlikdə oynamasına baxmayaraq, Federer hələ də 36 yaşında dünyanın 1 nömrəli oyunçusu olmaq və ardıcıl 237 həftə ərzində reytinqin zirvəsində qalmaq da daxil olmaqla bir çox rekordları qırıb.

Roje Federer verdiyi qərarın onun üçün kədərli olduğunu deyib.

"Bu, acı bir qərardır, çünki turun mənə verdiyi hər şey üçün darıxacağam. Ancaq eyni zamanda qeyd ediləcək çox şey var. Mən özümü dünyanın ən şanslı insanlarından biri hesab edirəm. Mənə tennis oynamaq üçün xüsusi istedad verildi və mən bunu heç vaxt təsəvvür etmədiyim səviyyədə, mümkün hesab etdiyimdən daha uzun müddət ərzində bacardım”.

Fanatlarına təşəkkür etməklə yanaşı, Federer komandasına, sponsorlarına, valideynlərinə, bacısına, həyat yoldaşına və uşaqlarına təşəkkür edib və İsveçrənin Bazel şəhərində böyüdüyü vaxtları xatırlayıb.

"Mənim tennis sevgim başlayanda mən doğma şəhərim Bazeldə topla oynayan uşaq idim. Futbolçulara heyranlıqla baxırdım. Onlar mənim üçün nəhənglər idi və mən xəyal qurmağa başladım. Arzularım məni daha çox işləməyə sövq etdi və özümə inanmağa başladım. Bəzi uğurlar mənə inam gətirdi və mən bu günə aparan ən heyrətamiz səyahətə doğru gedirdim. Buna görə də, bütün dünya üzrə gənc İsveçrə topçusunun xəyallarını gerçəkləşdirməyə kömək edən hər kəsə ürəkdən təşəkkür etmək istəyirəm” , - Federer paylaşımında bildirib.

Roje Federer 1981-ci ildə İsveçrənin Bazel şəhərində anadan olub. O, ilk olaraq 1998-ci ildə peşəkar turnirdə iştirak edib. Gələcəyin 1 nömrəli tennisçisi ilk turnirin 1/16 finalında Lukas Arnold Kerə məğlub olub. İlk finalını 2000-ci ildə Marsel Açıq turnirində Marc Rossetə qarşı oynayıb. Bu final oyununda 3 setdə məğlub olub.

Roje Federer Novak Cokovic və Rafael Nadalı geridə qoyaraq, üçüncü ən çox "Böyük Dəbilqə" turniri titulunu qazanıb. O, kişilər arasında ardıcıl on Böyük Dəbilqə turnirinin qalibi olan və cəmi 31 Böyük Dəbilqə finalına çıxan yeganə oyunçudur.

Federer beş dəfə (2004-2007, 2009) ATP-də İlin Oyunçusu və beş dəfə ITF Dünya Çempionu seçilib (2004-2007, 2009). Roje Federer, ardıcıl 18 dəfə (2003-2020) ATP Azarkeşlərinin Sevimli mükafatını, 13 dəfə isə Stefan Edberq İdman Mükafatını (2004-09, 2011-17) qazanıb. O, həmçinin 2017-ci ildən sonra iki dəfə "Artur Aşe” ilin humanitar mükafatını (2006, 2013), "Laureus” ilin idmançısı mükafatını beş dəfə (2005-08, 2018) və bir dəfə "Laureus” ilin geri dönüşü mükafatını qazanıb.

Sadiq Cavadov