Azərbaycanın gimnastika yığması Avropa kubokunun qalibi olub

Bakıda keçirilən Avropa kubokunda Azərbaycanın bədii gimnastika üzrə qrup hərəkətləri komandası möhtəşəm çıxışı ilə birinci yeri qazanıb.

Ləman Əlimuradova, Darya Sorokina, Yelizaveta Luzan, Kamilla Əliyeva və Sofiya Məmmədovadan ibarət kollektiv üç top və iki halqa ilə nümayiş etdirdiyi kompozisiyaya görə 24 700 xal toplayaraq turnirin qalibi olub. Bu nəticə ilə Azərbaycan komandası Ukraynanı (24 350 xal) və İtaliyanı (24 000 xal) geridə qoyaraq qızıl medala sahib çıxıb.

Digər növdə - beş lentlə çıxışda isə komandamız 19 750 xalla beşinci yerdə qərarlaşıb. Bu proqramda İtaliya (24 900 xal) birinci, Estoniya (22 000 xal) ikinci, Bolqarıstan (21 950 xal) isə üçüncü olub.

Bundan əlavə, Azərbaycan təmsilçiləri "Cross Battle" formatında keçiriləcək çoxnövçülük finalına da vəsiqə qazanıblar.

Avropa kuboku yarışları mayın 4-də başa çatacaq.