Sülh sazişi istiqamətində Ermənistan təşəbbüs göstərməlidir - Hacıyev

 

"Sülh sazişi Azərbaycanın təşəbbüsü olub və sülh sənədi Ermənistana təqdim olunub. Sənədlə bağlı 70% razılıq da əldə olunmuşdu. Sənəd nə qədər tez imzalanarsa iki ölkə arasında münasibətlər də bir o  qədər tez qaydasına düşər. Qarşılıqlı proses olmalıdır. Sülh sənədinin imzalanması Azərbaycanın gündəliyində hələ də qalır. Ermənistan ərazi iddiasından əl çəkməlidir və Azərbaycan ərazisində olan hərbi qüvvələrini çıxarmalıdır. Kifayət qədər ağır bunkerlər və tanklar hələ də bizim ərazidə qalırdı. Dünən gecə Şuşa bombalanıb və bir mülki şəxsimiz vəfat edib. Hər halda Azərbaycanın bu istiqamətdə mövqeyi bəllidir", - Hikmət Hacıyev bölgədəki son vəziyyətlə bağlı sentyabrın 20-də Xarici İşlər Nazirliyində Azərbaycanda akkreditə olunmuş diplomatik korpus üçün keçirilən brifinqdə Qazaxıstanlı səfirin sualını cavablayarkən bildirilib. 

 

Sentyabrın 14-də Ermənistan hökuməti Azərbaycan tərəfdən sülh sazişi ilə bağlı təkliflər aldığını açıqlayıb.  Sentyabrın 13-də Rəsmi Bakı Ermənistan tərəfinə "Sülh və dövlətlərarası münasibətlərin qurulması haqqında” saziş layihəsi ilə yeni şərhlər göndərdiyini açıqlayıb. 
 
Ermənistanın baş naziri Nikol Paşinyan sonuncu dəfə "France-Press"ə müsahibəsində vurğulayıb ki, sülh müqaviləsi imzalanmayana və bu müqavilə hər iki ölkənin parlamentləri tərəfindən ratifikasiya olunmayana qədər müharibə ehtimalı çox yüksəkdir.

Azərbaycan prezidenti İlham Əliyev isə Şuşada keçirilən sonuncu Qlobal Media Forumda söyləyib ki, bu ilin sonuna kimi Ermənistanla sülh müqaviləsinin imzalanmasını real hesab edir.

Azərbaycanla Ermənistan arasında hərbi əməliyyatlar 2020-ci ilin noyabrında üçtərəfli bəyanat ilə dayandırılıb. Bəyanatdan sonra Rusiya sülhməramlıları 5 il müddətində Qarabağa müvəqqəti sülhməramlı kimi yerləşdirilib. Hazırda sülhməramlıların fəliyyətinin 2 il yarımı bitib. Bu dövrdən sonra Azərbaycan Ermənistanla  bir çox rəsmi görüşlər keçirib. Hazırda sülh müqaviləsi üzərində danışıq prosesləri gedir. 

 

Gülnar Nazimqızı