Ötən il yetkinlik yaşına çatmayan qızların nikaha məcbur edilməsi ilə bağlı bir cinayət işi açılıb
28.02.2024 11:15
2023-cü ildə yetkinlik yaşına çatmayan bir nəfərə erkən nikaha məcbur etməyə görə cinayət işi açılıb.. Bunu Ailə, Qadın və Uşaq Problemləri üzrə Dövlət Komitəsinin şöbə müdiri Taliyə İbrahimova bildirib.
Onun sözlərinə görə, 2022-ci ildə 18 yaşadək analar tərəfindən 2011 uşaq dünyaya gətirilib.
" 2022-ci illə müqayisədə 2021-ci ildə 361 nəfər artım olub. Erkən nikaha Qazax-Tovuz, Mərkəzi Aran və Qarabağ rayonları qeydə alınıb. Ailə Məcəlləsinə əsasən, nikah yaşının bir yaş azaldılması ilə bağlı yerli icra hakimiyyəti orqanları tərəfindən 271 qərar (Qazax-Tovuz və Mərkəzi Aran rayonları üstünlük təşkil edir) qəbul edilib. Dövlət Komitəsinin yerli icra hakimiyyəti orqanlarından əldə etdiyi məlumata əsasən, 269 erkən evliliyin qarşısı alınıb",- şöbə müdiri erkən nikahlarla bağlı müzakirə tədbirində deyib.
Azərbaycan Respublikası Ailə Məcəlləsinin 10-cu maddəsinə əsasən Azərbaycanda nikah yaşı 18 yaş müəyyən olunub. Yalnız üzürlü səbəblər olduqda, nikaha daxil olmaq istəyən və nikah yaşına çatmamış şəxslərin yaşadıqları ərazinin müvafiq icra hakimiyyəti orqanı onların xahişi ilə nikah yaşının 1 ildən çox olmayaraq azaldılmasına icazə verə bilər.
Aytac Zeynalova
www.anews.az
Foto 
Video 
