Tikinti materialları bazarı bağlanıb- QIYMƏTLƏR ARTIR

28.05.2020 21:42

Manatın ucuzlaşması ilə bağlı vüsət alan bahalaşma tikinti materialları bazarında da öz təsirini göstərməyə başlayır. Bəzi məlumatlara görə, müxtəlif tikinti mallarının qiymətləri bahalaşıb. Xüsusən də, xarici ölkələrdən idxal olunan tikinti materiallarının qiymətlərində kəskin artım müşahidə olunur. Rusiyadan idxal olunan taxta, parket materialları son dövrlərdəki ucuzlaşmadan sonra yenidən bahalaşmağa başlayıb.

Yerli tikinti materialları bahalaşmayıb

ANN.Az Fins.az-a istinadən xəbər verir ki, daşınmaz əmlak və tikinti materialları bazarındakı vəziyyətlə bağlı kiçik araşdırma apardıq. Bu sahədə çalışanların bəziləri tikinti materiallarının qiymətinin artmadığını, bəziləri isə artdığını bildirir.

Üzlük daş və kubik istehsalı və satışı ilə məşğul olan Anar Musayev deyir ki, hələlik bu materialların qiymətində dəyişiklik olmayıb, lakin bahalaşma olacağı haqda söz-söhbət gəzir və qiymət dəyişikliyi gözlənilir. İstehsalçının sözlərinə görə, bu materiallar üzrə sifarişlərin həcmində ciddi dəyişiklik olmayib, lakin digər materiallarda bahalaşma olsa bu, daş və üzlük materiallarında da qiymətərin artmasına gətirib çıxaracaq.

Digər satıcı Elnur Nuriyev isə deyir ki, ən çox bahalaşma taxta materiallarının qiymətində qeydə alınıb. Onun sözlərinə görə, 3 gün qabaq taxtanın kubu 175 manat idi, hazırda bu qiymət 250 manata qalxıb. Hazırda təklif ediən taxtaların əvvəlcədən ucuz qiymətə alındığını etiraf edən satıcının sözlərinə görə, yeni qiymətləri mağaza sahibi bundan sonra bu materialın baha qiymətə alınacağını deyərək müəyyən edib.

Tikinti bazarı bağlanıb, satış dayandırılıb

Bakıdakı "Dərnəgül” şossesində yerləşən məşhur tikinti materialları bazarında işləyən satıcılarla telefon söhbətimizdə bildirdilər ki, 2 gündür bazarda satış dayandırılıb, satış nöqtələri bağlanıb.

Qiymətlərin necə olacağı barədə hansısa fikir bildirməyən satıcılar mağaza sahiblərinin gözləmə mövqeyi tutduğunu, yaxın günlərdə vəziyyətdən asılı olaraq qiymətlərin müəyyən ediləcəyini vurğuladılar.

Onların sözlərinə görə, manatın məzənnəsi indiki həddə qalmaqda davam etsə, qiymətlərin kəskin bahalaşması qaçılmaz olacaq, çünki əksər tikinti materialları xarici ölkələrdən valyuta ilə idxal olunur.

ANN.Az

Xəbəri bəyəndiniz?

Sosial şəbəkələrdə paylaş