Tramp və Səudiyyə Ərəbistanı arasında gərginlik artır

Trampın komandası artıq başa düşüb ki, ABŞ-da neft hasilatını əhəmiyyətli dərəcədə artırmaq və bununla da dünya bazarında qiymətləri aşağı salmaq mümkün olmayacaq.

"Tramp nə qədər qaydanı ləğv etsə də neft şirkətlərinin rəhbərlərinə görə, ABŞ-da növbəti neft bumu yaxın gələcəkdə gözlənilmir.  ABŞ neft bumu dövründə bir çox istehsalçının iflas həddinə çatmasından sonra indi xərcləri azaltmağa və investorların pullarını qaytarmağa çalışır", – WSJ yazır.

Buna görə də Tramp Səudiyyə Ərəbistanı və digər OPEC ölkələrini hasilatı artıraraq bazara daha çox neft buraxmağa inandırmağa çalışır. Lakin Səudiyyə Ərəbistanı artıq açıq şəkildə bunun baş verməyəcəyini bəyan edib.

Trampın komandası neftin qiymətini 45 dollar səviyyəsinə qədər endirmək istəyir (hazırda 73 dollar, 2022-ci ildə isə 94 dollardan çox idi). Lakin belə qiymətlər həm ABŞ-ın şist neft istehsalçıları, həm də Səudiyyə Ərəbistanı üçün "fəlakətli” ola bilər – çünki bu iki tərəf qlobal neft bazarında Trampın ən güclü tərəfdaşları hesab olunur.

Onlarla şist neft istehsalçısı 2020-ci ildə COVID-19 pandemiyası səbəbindən qiymətlərin kəskin düşməsi fonunda müflis olub. Digər tərəfdən, Səudiyyə Ərəbistanı da belə aşağı qiymətlərlə büdcəsini balanslaşdıra bilməz.