Türkiyə ABŞ-la sanksiyaların ləğvini müzakirə etməyə başlayacaq

"Türkiyənin ABŞ-da qəbul edilən CAATSA qanunu çərçivəsində sanksiyalara məruz qalması müttəfiqlik münasibətlərimizə uyğun deyil və NATO-nun iki ölkəsi arasındakı ittifaq ruhu ilə ziddiyyət təşkil edir. Bu vəziyyətdən xilas olmaq lazımdır. Hələ bu məsələ üzərində işləməyə başlamamışıq. Bildiyiniz kimi, ABŞ Senatı və Konqresi yeni formalaşıb, Ağ Evin yeni administrasiyası isə işə başlayıb. Bəzi nazirliklər bir qədər gec fəaliyyət göstərəcək. Bu, ABŞ-ın xüsusiyyətlərindən biridir. Tezliklə bu məsələ üzərində işləməyə başlayacağıq. Mart ayından etibarən bu mövzular aktiv şəkildə müzakirə olunacaq" – Fidan Anadolu agentliyinə müsahibəsində bildirib.

Donald Trampın prezident vəzifəsinə başlamasından danışan Fidan qeyd edib ki, "ABŞ administrasiyası üçün yeni bir səhifə açılır, lakin bu səhifədə köhnə qeydlər qalacaq, yoxsa yeniləri əlavə olunacaq – bunu görmək lazımdır”.

"Bildiyiniz kimi, əvvəlki administrasiya ilə, xüsusilə son bir yarım il ərzində çox intensiv diplomatik iş aparılıb. Strateji tərəfdaşlıq mexanizmi yenidən fəaliyyətə başlayıb və bəzi məsələlərdə irəliləyiş əldə olunub", –  nazir əlavə edib.

Ankaraya qarşı əvvəllər Rusiyadan S-400 zenit-raket sistemi (ZRS) alması səbəbilə CAATSA qanunu çərçivəsində məhdudiyyətlər tətbiq olunmuşdu. Bu sanksiyalar Türkiyə Müdafiə Sənayesi Katibliyinə və onun bəzi rəhbərlərinə qarşı yönəlmişdi.