Vəkil Zamin Salayevin ev dustaqlığına buraxılması ilə bağlı vəsatət qaldırıb

"Bu gün (martın 29-da) atam zəng etdi. Onun durumu  getdikcə pisləşir. O, artıq təkbaşına yeriyə bilmir. Atamın baş ağrıları, başgicəllənmələri artıb.  O, vaxtaşırı huşunu itirir. Buna baxmayaraq, ata aclığı davam etdirmək niyyətindədir”, - deyə Salayev bildirib.

Martın 29-da Zamin Salayevin vəkili Nemət Kərimli müxalifətçinin ev dustaqlığına buraxılması ilə bağlı yenidən Qaradağ Rayon Məhkəməsinə vəsatət təqdim edib. O, ərizəni məhkəməyə şəxsən təqdim edib.

Onun sözlərinə görə, martın 13-də poçt vasitəsilə göndərilən əvvəlki müraciət ünvana çatmayıb.

Öz növbəsində, Ombudsman Aparatının mətbuat xidmətinin rəhbəri Emil Şahzadə Salayevin vəziyyəti ilə bağlı bildirib ki, martda şöbənin nümayəndələri təcridxanada onunla bir neçə dəfə görüşüblər. 

Bununla bağlı dövlət orqanlarına müvafiq müraciətlər göndərilib.

Zamin Salayevin səhhətinin vəziyyəti və saxlanma şəraiti ombudsmanın diqqət mərkəzindədir.

"Onun vəziyyəti haqqında məlumat mütəmadi olaraq tələb olunur və öyrənilir. Bu gün isə Ombudsman Aparatı Bakı İstintaq Təcridxanası ilə əlaqə saxlayıb və Salayevin yenidən tibbi müayinədən keçəcəyi barədə məlumat alıb”, - Şahzadə vurğulayıb.

Penitensiar xidmətin ictimaiyyətlə əlaqələr şöbəsindən məsələyə münasibət öyrənmək mümkün olmayıb.