Əmlak Məsələləri Dövlət Xidmətinin dələduzluqda ittiham edilən məmurları Pəhlivan Güləliyev, Yusif Balabəyov və Azər Əliyev Cinayət Məcəlləsinin 178.3.2-ci (külli miqdarda dələduzluq) maddəsi ilə təqsirli bilinərək məhkəmə zalında həbs ediliblər. 

Pəhlivan Güləliyev və Azər Əliyev  "Daşınmaz Əmlakın Dövlət kadastrı və reyestri” publik hüquqi şəxsin tabeliyindəki MMC-də mühəndis işləyiblər.

 

Şamaxı bələdiyyəsində mühasib işləyən Yusif Balabəyov onlara  Pərvin adlı şəxsin  ona müraciət edərək Yeni Suraxanı qəsəbəsində 2,35 hektar sahibsiz torpaq sahəsi tapdığını və onu sənədləşdirmək istədiyini bildirib.  Həmin şəxslər Pərvinə bu işi 250 min manat qarşılığında həll edəcəklərini, torpağı 25 yerə bölərək hərəsi 10 sot olmaqla 25 müxtəlif şəxsin adına rəsmiləşdirəcəklərinə söz veriblər.

Lakin adları çəkilən şəxslər 250 min manat pul alsalar da, ərazisində yerləşən magistral neft və qaz kəmərlərinin mühafizə zonası olmaqla "Sənaye, nəqliyyat, rabitə, müdafiə və digər torpaqlar” kateqoriyasına aid dövlət mülkiyyəti olan 2,35 ha torpaq sahəsini özəlləşdirə bilməyiblər.

 

Verdiyi pulları da geri ala bilmədiyini görən Pərvin bununla bağlı Baş Prokurorluğun Korrupsiyaya qarşı Mübarizə Baş İdarəsinə müraciət edib və cinayət işi açılıb.