İsrail və İran məndən sülh üçün vasitəçilik istəyib -Tramp

ABŞ prezidenti Donald Tramp bildirib ki, İsrail və İran ona eyni vaxtda  müraciət edərək münaqişənin dayandırılmasında və Yaxın Şərqdə sülhün bərqərar edilməsində kömək istəyiblər.

“İsrail və İran mənə demək olar ki, eyni vaxtda müraciət etdilər və dedilər ki, ‘Sülh!’ Mən bildim ki, vaxt yetişib. Sülh və Yaxın Şərq — əsl QALİBLƏR bunlardır!”, — Tramp  Social hesabında yazıb.

O əlavə edib ki, hər iki ölkəni gələcəkdə “böyük sevgi, sülh və rifah” gözləyir. Lakin xəbərdarlıq edib ki, “doğru və haqq yolundan çıxarlarsa, çox şey qazana, amma çox şey də itirə bilərlər”. “Tanrı onları qorusun”, — o vurğulayıb.

Bundan əvvəl Tramp bəyan etmişdi ki, tərəflər tam atəşkəs barədə razılığa gəliblər. Onun sözlərinə görə, ilk olaraq İran atəşi dayandıracaq, 12 saat sonra isə İsrail.

Tramp hesab edir ki, bu, 12 günlük müharibənin sonu olacaq.

Reuters agentliyinə danışan Ağ Evin nümayəndəsi bildirib ki, Tramp iyunun 23-də İsrailin baş naziri Benyamin Netanyahuyla telefon danışığı zamanı atəşkəs razılaşması əldə edib.

Paralel olaraq, ABŞ-ın vitse-prezidenti Cey Di Vens, dövlət katibi Marko Rubio və Trampın xüsusi nümayəndəsi Stiven Uitkof İran rəsmiləri ilə birbaşa və dolayı məsləhətləşmələr aparıblar.

Mənbənin sözlərinə görə, İsrail yalnız İranın yeni zərbələr endirməyəcəyi təqdirdə atəşkəsə razılıq verib. Tehran isə hərbi əməliyyatları davam etdirməyəcəyini bəyan edib.

N.Təbrizli