Rusiyalı jurnalist Parisdəki evində ölü tapıldı

Parisin şəhərətrafı yaşayış məntəqəsi olan Medonda yaşayan 38 yaşlı rusiyalı jurnalist Yevgeni Safronovun cəsədi yaşadığı binanın yaxınlığında aşkarlanıb.

Bu barədə “Le Figaro” nəşri məlumat yayıb.

Bildirilib ki, hadisə yanvarın 6-da baş verib. Belə ki, jurnalist binanın yeddinci mərtəbəsindəki mənzilinin pəncərələri altında ölü vəziyyətdə tapılıb. Mənzilə baxış zamanı pəncərənin yanında bir stulun dayandığı, zibil qutusunda isə çoxsaylı dərman preparatlarının olduğu müəyyən edilib.

Təxminən altı aydır Parisdə məskunlaşan 38 yaşlı jurnalistin son zamanlar depressiyadan əziyyət çəkdiyi müəyyən olunub.

Faktla bağlı yerli polis tərəfindən araşdırma aparılır.