Qonşu ölkədə ana 3 və 5 yaşlı uşaqlarını beşinci mərtəbədən atıb

Qazaxıstanda bir qadın iki azyaşlı övladını beşinci mərtəbənin pəncərəsindən atıb. Hadisə Taraz şəhərində baş verib. Bu barədə Jambıl vilayəti Polis İdarəsinə istinadən Nur.kz məlumat yayıb.

Polisin bildirdiyinə görə, 2021 və 2023-cü il təvəllüdlü uşaqlar hündürlükdən yıxılmasına baxmayaraq sağ qalıblar. Onlara qapalı kəllə-beyin travması və beyin ödemi diaqnozu qoyulub. Böyük uşağın bud sümüyünün yerindən tərpənmə ilə sınığı da aşkar edilib.

Həkimlər azyaşlıların həyatını xilas etmək üçün müalicəni davam etdirir. Uşaqlar baş, sinə və çanaq nahiyələrinin kompüter tomoqrafiyasından (KT) keçirilib, laparosentez aparılıb və ödem əleyhinə terapiyaya başlanılıb. Böyük uşağın ayağından cərrahi əməliyyat olunacağı bildirilir.

Hadisə ilə bağlı ilkin istintaq başladılıb. Şübhəli şəxs saxlanılaraq müvəqqəti saxlama təcridxanasına yerləşdirilib. Hazırda zəruri istintaq hərəkətləri aparılır. Qadının bu addımı atmasının səbəbləri barədə rəsmi məlumat açıqlanmayıb.

Gülnar