Almaniya Ukraynaya 1,3 milyard avro dəyərində yardım paketi ayırıb

Almaniya Ukraynaya ümumi dəyəri 1,3 milyard avrodan çox olan yeni hərtərəfli yardım paketi ayırıb.Bunu Ukrayna Prezidenti Volodimir Zelenski Almaniya kansleri Fridrix Mertslə Kiyevdə keçirdiyi birgə mətbuat konfransında bildirib.

Onun sözlərinə görə, paketə silah tədarükü, Ukraynanın enerji sektoruna dəstək, eləcə də Rusiyanın istifadə etdiyi reaktiv "Shahed" PUA-larına qarşı yeni ələkeçirici dronların istehsalının maliyyələşdirilməsi daxildir.

"Ukrayna üçün dəyəri 1,3 milyard avrodan çox olan yeni hərtərəfli dəstək paketi var. Buraya hazırda bizə kömək edəcək silahlar, enerji sektorumuza dəstək, həmçinin qarşıdan gələn qış üçün çox mühüm enerji paketi daxildir", – Zelenski deyib.

Almaniya kansleri Fridrix Merts isə bildirib ki, yardım paketinin təxminən 1 milyard avrosu hərbi dəstəyə, 350 milyon avrosu isə enerji sektoruna yönəldiləcək.

Zelenskinin sözlərinə görə, iki ölkə arasında təhlükəsizlik sahəsində əməkdaşlığa dair 15 saziş və sənəd də imzalanıb. Sənədlər silah istehsalı və satınalmaları, Ukraynanın Almaniya sənayesi üçün sifarişləri, həmçinin Ukraynada həyata keçiriləcək birgə layihələri əhatə edir.

Ukrayna Prezidenti bu razılaşmaların ümumi dəyərinin 8,5 milyard avrodan çox olduğunu bildirib.

Merts Ukrayna ilə əlavə hərbi əməkdaşlıq barədə razılıq əldə olunduğunu bildirib, lakin bununla bağlı detalları açıqlamayıb.

"Almaniya limitsiz olaraq Ukraynanın yanındadır. Ukraynanı həlledici həftə gözləyir, ona görə də mən bu gün Kiyevdəyəm", – kansler deyib.

Merts həmçinin Rusiyanın müharibəni uzun müddət davam etdirmək imkanlarının məhdud olduğunu bildirib və ölkə iqtisadiyyatının müharibənin təsiri ilə ciddi təzyiq altında qaldığını vurğulayıb.

Kanslerin sözlərinə görə, Almaniya ilə Ukrayna arasında əməkdaşlıq yalnız hərbi yardımla məhdudlaşmamalı, birgə layihələri və biznes əlaqələrini də əhatə etməlidir.