Yasamal: Bakının seçilən rayonu

02.12.2023 11:56

Bakının mərkəzi rayonlarından biri olan Yasamal rayonunun bir inzibati vahid kimi artıq yüzdən çox yaşı var. Lakin tarixi və coqrafi bir ərazi kimi Yasamalın daha qədim tarixi var. Özünün spesifik adətləri və tarixi ilə fərqlənən Yasamal bügün paytaxt Bakının mühüm bir rayonudur.Ərazisi nisbətən kiçik olsa da, əhalisi yüz minlərlədir.Gözəl parklar, qədim məscidlər və müasir yaşayış komplekslərinin cəmləşdiyi bir rayon kimi tanınan Yasamal paytaxt Bakının son on illiklər ərzindəki sürətli inkişafını əks etdirir.Burada bir sıra metro stansiyaları, ölkənin aparıcı elm və təhsil ocaqları, dövlət idarələri və iri ticarət mərkəzləri cəmləşib. Bu gün Yasamalı elm-təhsil və gənclər rayonu kimi xarakterizə etmək olar.

Əminliklə demək olar ki, bu gün Yasamal Bakı şəhərinin ən təmiz və səliqə-səhmanlı rayonlarından biridir. Son illər müşahidə etsək görərik ki, rayon boyunca kommunal xidmətlər gündəlik qaydada operativ iş görür, məişət tullantılarını daşıyır, həftə sonları isə burada genişmiqyaslı daxili iməcilik aksiyaları keçirilir. Həyata keçirilən iməclik zamanı prospekt və küçələrin, səki kənarlarının və işıq dirəklərinin, yol kənarındakı məhəccərlərin, park və istirahət yerlərində oturacaqların yuyulması həyata keçirilir. Həmçinin yol kənarlarında yerləşən ictimai iaşə, ticarət və digər obyektlərin vitrinləri, köşkləri yuyulur, ətrafı təmizlənir.Yol kənarları, bordür və tullantı konteyneri ərazilərinin xüsusi maddələrlə yuyulması isə xüsusən təqdirəlayiq haldır.Şişirtmədən demək olar ki, bu gün Yasamal rayonu az qala parıldayır.Bu mənada Yasamal rayonu digərlərinə nümunə ola bilər.

Kommunal xidmətlər gündəlik qaydada iş görürlər

Digər təqdirəlayiq məqam isə Yasamal rayonu ərazisində, xüsusən də məhəllədaxili ərazilərdə, asfalt örtüklərinin təzələnməsidir. Son bir neçə ildə bu sahədə xeyli iş görülüb.Uzun illər təmir edilməyən və gediş-gəliş üçün yararsız yollar asfaltlanıb.Bunu xüsusən də Alatava,Yeni Yasamal, Sovetski və digər yaşayış massivlərindəki məhəllədaxili yollar barədə demək olar.Son dəfə az qala Sovet dövründə asfalt örtüyü təzələnmiş yollar son illər tam yenilənib.Yolların yenilənməsi həyata keçirilərkən ilk növbədə Yasamal rayon sakinlərinin təklifləri nəzərə alınır. Asfaltlama və təmir-bərpa işləri əsasən yol örtüyünün vəziyyəti qənaətbəxş olmayan torpaq əsaslı küçə və yollarda aparılır.Asfaltlama işləri çərçivəsində küçə boyu köhnə örtük sökülür, yararsız qrunt qazılaraq çıxarılır. Daha sonra isə yeni asfalt örtüyü döşənir.

Rayon ərazisindəki yararsız yollar asfaltlanır

Təqdirəlayiq digər hal isə Yasamal rayonunda yaşıllıqlara göstərilən diqqətdir. Son bir neçə il ərzində rayonda dəfələrlə ağacəkmə aksiyaları keçirilib. Ağaclar və gül kolları əkilib, parklarda təmizlik işləri aparılıb, mövcud ağaclar budanıb, səliqə-səhman yaradılıb. Bu gün Yasamal rayoundakı yaşıl zonalara xüsusi diqqət göstərilir və onlar mütəmadi qaydada sulanır, yaşıllıqlara aqrotexniki qulluq göstərilir. Bu cür aksiyanın keçirilməsində məqsəd Yasamal rayonunda yaşıllıq əraziləri genişləndirmək, ekoloji tarazlığın bərpasına nail olmaq, ətraf mühitin qorunmasına kömək etmək və ictimaiyyətin diqqətini yaşıllıqların qorunmasına yönəltməkdir.

Yasamal rayonunda yaşıllıqlara xüsusi diqqət göstərilir

Yasamal rayonunda baş verən digər diqqətiçəkən məqam rayonda yeni-yeni abad məhəllələrin, süni örtüklü futbol meydançalaırının və istirahət məkanlarının yaradılaması və sakinlərin ixtiyarına verilməsidir. Son illər qurulmuş və abadlaşdırılmış Abad həyətlərdən bu gün Yasamal sakinləri geniş istifadə edir. Bu cür məkanların istifadəyə verilməsi yerli sakinlərin, xüsusən də uşaq və yeniyetmələrin, asudə vaxtını səmərəli keçirmələri üçün gözəl imkanlar yaradıb.Rayonda idman və asudə infrastrukturunun yenilənməsi yeni nəslin inkişafı və pis vərdişlərdən qorunması baxmından mühüm əhəmiyyət daşıyır.