Putin və Paşinyan arasında telefon söhbəti olub

Ermənistanın təşəbbüsü ilə Rusiyanın Prezidenti Vladimir Putin və Ermənistanın Baş naziri Nikol Paşinyan arasında telefon danışığı keçirilib, bu, Azərbaycan və Ermənistan arasında sülhün təmin olunması istiqamətindəki davam edən səylərin bir hissəsidir.

Paşinyan, 8 avqustda Vaşinqtonda ABŞ Prezidenti Donald Tramp və Azərbaycan Prezidenti İlham Əliyev ilə keçirdiyi görüş barədə Putinlə ətraflı məlumat verib. Putin, Yerevan və Bakı arasında davamlı sülhün təmin olunması üçün atılan addımların əhəmiyyətini vurğulayıb və Rusiya tərəfinin 2020-2022-ci illərdə ən yüksək səviyyədə əldə olunan üçtərəfli razılaşmalara dəstək verməyə davam edəcəyini bir daha təsdiqləyib. Bu razılaşmalar, Ermənistan-Azərbaycan münasibətlərinin kompleks şəkildə normallaşdırılması, o cümlədən regionda nəqliyyat əlaqələrinin bərpa olunması məqsədini güdür.

Putin, həmçinin, ABŞ Prezidenti Donald Tramp ilə Alyaskada keçirilməsi planlaşdırılan sammitə hazırlıq çərçivəsində ABŞ Prezidentinin xüsusi nümayəndəsi Stiven Uitkoff ilə keçirdiyi görüşün nəticələri barədə Paşinyana məlumat verib. Paşinyan, Ukrayna böhranının sülh yolu ilə həlli istiqamətində atılan addımları dəstəklədiyini bildirib.

 Liderlər, həmçinin, ikitərəfli məsələləri, xüsusən ticarət və investisiya əməkdaşlığının inkişafını və Avrasiya İqtisadi Birliyi çərçivəsində əməkdaşlığın gücləndirilməsini müzakirə ediblər.

N.Təbrizli