ADU-nun orta məktəblərlə əlaqələri genişlənir - FOTOLAR

Bu gün Azərbaycan Dillər Universitetinin (ADU) Regionşünaslıq və Beynəlxalq Münasibətlər fakültəsinin dekanı, dosent Anar Nağıyev Bakı şəhəri Nərimanov rayonunda yerləşən 45 nömrəli orta məktəbin yuxarı sinif şagirdləri ilə görüşdü. ADU Tələbə Gənclər Təşkilatının (TGT) "Bir gün ADU-da” layihəsi çərçivəsində baş tutan görüşün əsas məqsədi universitet ilə məktəblər arasında əlaqələri genişləndirmək, şagirdlərdə ali təhsil müəssisəsi haqqında ilkin fikir formalaşdırmaq, həmçinin universitetlə qiyabi tanışlıq yaratmaq idi.

 

Sözügedən təhsil müəssisəsinin direktoru Nazilə Məmmədova ilə Anar Nağıyev arasında baş tutan görüşdə layihənin məqsədi və məktəblə universitet arasındakı əlaqələr haqqında fikir mübadiləsi aparıldı. Daha sonra şagirdlərlə görüşən Anar Nağıyev təmsil etdiyi Dillər Universitetinin tarixi, fəaliyyəti, tədris prosesi, beynəlxalq əlaqələri, fakültələri və kafedraları, dil mərkəzləri, açıq kitabxanaları, muzeyləri, tələbə həyatı haqqında geniş məlumat verdi. Universitetin müasir standartlara cavab verən maddi texniki bazası və infrastrukturu haqqında danışan dekan ali təhsil ocağının sinxron tərcümə kabinləri, auditoriyalar, böyük konfranslara ev sahibliyi edən akt zalları, İnformasiya Resurs Kompleksi, "Poliqlot” qəzeti, onlayn televiziya, elektron sayt ilə təchiz olunduğunu sözlərinə əlavə etdi.

 

Anar Nağıyev universitetin beynəlxalq əlaqələrindən danışarkən bu istiqamətdə mühüm rol oynayan və kadrlar yetişdirən Regionşünaslıq və Beynəlxalq Münasibətlər fakültəsinin yaranma tarixi, fəaliyyət istiqamətləri haqqında geniş məlumat verdi. O, rəhbərlik etdiyi fakültənin müxtəlif beynəlxalq proqramlar çərçivəsində dünyanın bir sıra nüfuzlu universitetləri ilə tələbə və müəllim mübadiləsi apardığını və buna misal olaraq bu yaxınlarda 10 nəfər tələbənin təhsillərini davam etdirmək üçün universitet hesabına Çinə göndərildiyini sözlərinə əlavə etdi. Fakültə dekanı bunun öz növbəsində dövlətimizin beynəlxalq aləmdə tanınması, təbliğ edilməsi baxımından əhəmiyyətli olduğunu vurğuladı. Daha sonra o, ADU-nun Regionşünaslıq və Beynəlxalq Münasibətlər fakültəsinin məzunlarının bu gün ölkəmizin öndəgedən dövlət orqanlarında fəaliyyət göstərməsini diqqətə çatdırdı. Çıxışının sonunda şagirdlərin suallarını cavablandıran Anar Nağıyev onları ADU-ya dəvət etdi.

 

Sonda məktəbin direktoru Nazilə Məmmədova geniş formatlı tanıtım üçün Anar Nağıyevə dərin təşəkkürünü bildirdi.