SOCAR və MSC strateji əməkdaşlıq sazişi imzalayıb

SOCAR və dünyanın ən böyük daşıma şirkəti Mediterranean Shipping Company (MSC) strateji əməkdaşlığa dair saziş imzalayıblar.

Razılaşmaya əsasən, MSC-nin törəmə şirkəti və qlobal terminal operatoru Terminal Investment Limited (TIL) Egey bölgəsinin ən böyük konteyner limanı olan “SOCAR Terminal”ın səhmdarı olacaq.

"Əməkdaşlıq “SOCAR Terminalı”nın TIL-in geniş qlobal şəbəkəsinə inteqrasiyasını təmin edəcək. Yeni avadanlıq və texnoloji sərmayələr nəticəsində terminal mövcud gücünü artıracaq, əməliyyat səmərəliliyini yüksəldəcək, rəqəmsallaşma, dayanıqlılıq və infrastruktur inkişafı sahəsində mühüm nailiyyətlər əldə edəcək.",  -  bəyanatda deyilir.

Tərəflər bildiriblər ki, saziş Türkiyənin qlobal təchizat zəncirində mövqeyini gücləndirəcək və terminalın rəqəmsallaşma, dayanıqlılıq və əməliyyat səmərəliliyi sahəsində inkişafına töhfə verəcək.

Egey bölgəsinin ən böyük konteyner terminalı olan “SOCAR Terminal” 700 metrlik fasiləsiz körpü, 16 metrlik dərinlik, 420 min m² liman ərazisi və 30 min m² arxa sahəsi ilə həm regional, həm də qlobal ticarət üçün strateji əhəmiyyət daşıyır.

ULCS sinifli yeni nəsil iri gəmiləri qəbul etmək imkanına malik olan terminal eyni anda bir neçə əsas gəmini sürətli şəkildə idarə edərək gözləmə müddətlərini minimuma endirir.

N.Təbrizli