Səbinə Əliyeva yenidən Ombudsman seçilib

Səbinə Əliyeva 100 deputatın səsini qazanaraq yenidən Azərbaycanın İnsan Hüquqları üzrə Müvəkkili (Ombudsman) seçilib.

Bu gün Milli Məclisin plenar iclasında Ombudsman vəzifəsinə namizədlər müzakirə olunub və məsələ səsverməyə çıxarılıb.

Səsvermənin nəticələrinə əsasən, Ceyhun Qaracayev 13, Elşanə Vəliyeva isə 8 deputatın səsini alıb.

Prezident İlham Əliyevin Milli Məclisə təqdim etdiyi sənəddə Ombudsman vəzifəsinə üç namizəd irəli sürülüb. Namizədlər hazırkı Ombudsman Səbinə Əliyeva, Konstitusiya Məhkəməsinin keçmiş hakimi, hüquq elmləri doktoru, professor Ceyhun Qaracayev və Ali Məhkəmənin hakimi, Hakimlərin Seçki Komitəsinin üzvü Elşanə Vəliyeva olub.

Qanunvericiliyə əsasən, Ombudsman 7 il müddətinə seçilir və eyni şəxs bu vəzifəyə iki dəfədən artıq seçilə bilməz.

Səbinə Əliyeva ilk dəfə 2019-cu il noyabrın 29-da Ombudsman seçilib.