ABB avtomobil bazarı ilə bağlı hesabat təqdim etdi

ABB avtomobil bazarı ilə maraqlanan hər kəs üçün faydalı olacaq geniş bir hesabat yayıb. Hesabat "Avtomobil bazarına baxış: qlobal trendlər və Azərbaycan” adlanır. Burada son 5 il üzrə dünyanın və Azərbaycanın avtomobil sektorunda özünü göstərən əsas meyllərin təhlili aparılıb. 2023-cü ildə ölkəmizdə hər 1000 nəfərə 171 avtomobil düşüb.

 

Son beş ildə "Lada”, "Mercedes-Benz”, "Hyundai” və "Toyota” markaları Azərbaycanda qeydiyyatda olan avtomobillər siyahısında ilk dördlükdə yer alıb. 2023-cü ildə Azərbaycana gətirilən avtomobillərin idxal miqdarı 28%, idxal dəyəri 79% artıb. 2023-cü ildə ölkəyə daxil olan hibrid avtomobillərin sayında 2022-ci illə müqayisədə 24.4%, elektrik avtomobillərinin sayında isə 5 dəfə artım baş verib. Ötən il elektrik avtomobillərinin idxal dəyərində də 6 dəfə artım müşahidə edilib.

 

Hesabatda ölkəmizdə ikinci əl avtomobil bazarı ilə bağlı da ətraflı araşdırmalar var. Ölkədə istifadə edilən avtomobillərin 58%-i istehsal tarixi 15 ildən az olan avtomobillərdir. İkinci əl avtomobil bazarının əsas markaları VAZ-2107, "Opel Astra”, VAZ 2106, "Kia Sorento”, "Hyundai Elantra”, "Hyundai Santa Fe”, "Hyundai Sonata”, "Chevrolet Cruze”, "Ford Transit”, "Mercedes E 220d” markalarıdır.

Qeyd edək ki, maraqlı tərəflər üçün faydalı olan bu cür araşdırma-hesabatların hazırlanması bir çox xarici bankların geniş istifadə etdiyi təcrübədir. Azərbaycanda bu təcrübəni ilk dəfə məhz ABB tətbiq edib. Belə ki, Bank bu il "Bakı şəhəri üzrə daşınmaz əmlak bazarının təhlili”, "Azərbaycan üzrə pərakəndə ticarət sektorunun təhlili: trendlər və nəticələr”, "Rəqəmlərlə turizm: Azərbaycan turizm sektorunun statistik mənzərəsi” adlı hesabatlarını bölüşüb.

 

Hesabatlarla buradan tanış ola bilərsiniz.