Bu sözləri mədəniyyət və turizm nazirinin müavini Nazim Səmədov "Caspian European Club"da jurnalistlərin suallarını cavablandırarkən deyib.

ANN.Az xəbər verir ki, hazırda ölkədə fəaliyyət göstərən 60-dan çox turizm şirkəti elektron viza xidmətindən istifadə edir.

Hotellərin qiyməti məsələsinə toxunan nazir müavini qeyd edib ki, bu məsələ bazar tərəfindən tənzimlənir: "Və burada sahibkarların üzərinə məsuliyyətli iş düşür ki, onlar öz peşə vəzifələrini yerinə yetirərək qiymətlərin tənzimlənməsindən nəticələr çıxarsınlar. Təbii ki, bu qiymətlərin formalaşmasında tələb və təkliflər əsas rol oynayır. Harada peşəkarsızlıq və maya dəyəri üzərinə əlavə dəyərin düzgün hesablanmaması varsa, biz konsultasiyalar təşkil etmişik və bununda nəticəsində hotellərdə yenidən qiymətləndirmə aparılıb. Amma yenə də deyirəm, dövlət olaraq biz bu sahədə müzakirələrimizi davam etdirməli, Mədəniyyət və Turizm Nazirliyi olaraq  öz təkliflərimizi irəli sürəcəyik”.

İndiyə qədər irəli sürülən təkliflərə toxunan Nazim Səmədov onlardan bəzilərini sadalayıb: "Həm vergi güzəştlərində, həm sahibkarlar tərəfindən çəkilən xərclərin dövlət tərəfindən qarşılanması təklifi irəli sürülüb. Həm də 2 və 3 ulduzlu hotellərə diqqətin artırılmasını vacib saymışıq.

Nazir müavini qeyd edib ki, turizm sahəsində bahaçılığı iki şərt əmələ gətirir:aviabilrtlərin və hotellərin qiymətləri: "Aviabiletlər sahəsində müəyyən güzəştlər edildi, bu da turizm sahəsində irəliləyişlərin olacağından xəbər verir. Mehmanxanalarla bağlı müəyyən işlər görmüşük və dünya praktikasında bu cür turizmi inkişaf etdirən ölkələrdə vergi güzəştləri tətbiq edilir. Və ölkəmizdə artıq bu sahədə işlər görməyində vaxtı çatıb”.

Hazırda 15 min vizaların verilməsinin rəsmiləşdirildiyini deyən Nazim Səmədov faktiki olaraq gözləmək üçün  5-7 gün vaxt çəkdiyini vurğulayıb: "Bu il ölkəmizə daha çox 4 ölkədən turist gəlib: Rusiya, Gürüstan, Türkiyə, İran. Bizim statistikamız da bu 4 ölkədən asılıdır. Və təbii ki, bu ölkələrdə baş verən proseslər turist axınına təsirini göstərir. Bildiyiniz kimi, Rusiyada iqtisadi böhran var. Bu da turizm sahəsinə öz təsirini göstərir. Turizm sahəsi elədir ki, böhran ilk növbədə ona təsir edir. 9 ay ərzində ölkəmizə 1 milyona yaxın turist gəlib. Amma 10 faizə yaxın azalma müşahidə edilib. Azalma ən çox Rusiya və Gürcüstandan gələn turistlərin sayında müşahidə olunub. Amma digər ölkələr məsələn İran körfəzi ölkələri, Avstraliya, hətta Afrika ölkələrindən gələn turistlərin sayında artım müşahidə edilib. Amma bu artımı o azalma ilə müqayisə etmək düzgün olmaz. Çünki bayaq sadaladığım 4 ölkə bizim turizm sahəsinin 95 faizini əhatə edir. Biz bu sahədə olan azalmaya hazır idik. Çünki dünya bazarında neftin qiyməti düşüb və belə halla biz artıq 2008-ci ildə rastlaşmışdıq. Necə deyərlər, biz bu azalmayaq hazırıq”.