Avropa Parlamenti Ukraynaya 18 milyard avro kredit ayırması qərarını dəstəkləyib

16:50 | 24.11.2022
Avropa Parlamentinin üzvləri Avropa Komissiyasının 2023-cü ildə Ukraynaya 18 milyard avroluq makromaliyyə yardımı ayırması planını dəstəkləyiblər. Bu barədə Avropa Parlamentinin saytında məlumat verilib.

Parlamentarilər hesab edirlər ki, bu məbləğ Ukraynanın əsas dövlət xidmətlərinin göstərilməsi və kritik infrastrukturun bərpası üçün aylıq ehtiyaclarının bir hissəsini ödəməyə kömək edəcək. Dəstək paketi gələn ilin əvvəlindən müntəzəm hissələrlə ödəniləcək kreditlər şəklində veriləcək.

Ötən həftə Ukraynanın baş naziri Denis Şmıqal bildirib ki, fevralın sonunda ölkədə hərbi əməliyyatlar başlayandan bəri Kiyev 23 milyard dollardan çox xarici maliyyə yardımı alıb.

Həmçinin məlumat verilib ki, Avropa Yenidənqurma və İnkişaf Bankı (AYİB) Ukraynaya 384 milyon dollar (372 milyon avro) məbləğində maliyyə yardımının ayrılmasını təsdiqləyib.

Hazırda Ukraynada Rusiya Federasiyası Silahlı Qüvvələrinin xüsusi əməliyyatı davam edir. Bunu fevralın 24-də Rusiya prezidenti Vladimir Putin bəyan edib. Onun sözlərinə görə, hərbi əməliyyatın məqsədi qonşu ölkəni demilitarizasiya etmək və onun hakimiyyətini denazifikasiya etməkdir.
 
Gülnar Nazimqızı 

www.anews.az
0
Bizi sosial şəbəkələrdə izləyin !

REKLAM