Azərbaycanın mərhum eks-prezidenti Əbülfəz Elçibəyin oğlu Ərturqut Əliyev Modern.az saytına açıqlamasında Müsavat və AXCP-ni bir-birinə  ünvanladıqları qarşılıqlı ittihamlar zamanı atasının adını çəkməməyə çağırıb. Modern.az Ə.Əliyevin müraciətinə AXCP və Müsavatdan münasibət öyrənib.Fuad Qəhrəmanlı: “AXCP  Elçibəyin ruhunun dinc buraxılmasının tərəfdarıdır”AXCP sədrinin müavini Fuad Qəhrəmanlı bildirib ki, təmsil etdiyi partiya bu gün də Ə.Elçibəyə böyük rəğbət bəsləyir, ideyalarını, missiyalarını davam etdirir. “AXCP öz mərhum keçmiş sədrini ona qarşı yönələn ittihamlardan qorumaqla məşğuldur. Bu gün Əbülfəz Elçibəyin adından istifadə edərək “Yeni Müsavat” qəzeti AXCP haqqında böhtan yağdırılır. AXCP funksionerləri təbii ki, mərhum prezidentə qarşı aparılan kampaniyalara cavab verir. Bu gün onun adından istifadə edənlər vaxtilə Elçibəyə qarşı əks-təbliğat aparıblar. Biz də onları ifşa edib üzə çıxarırıq. AXCP təbii ki, Elçibəyin ruhunun dinc buraxılmasının tərəfdarıdır. AXCP Elçibəyin adından istifadə edənlərə qarşı müqavimət göstərir”.Rauf Arifoğlu: “Ərturqutun müraciətini nəzərə alacağıq”“Yeni Müsavat” qəzetinin baş redaktoru, Müsavat partiyasının üzvü Rauf Arifoğlu Ə. Əliyevin fikirlərini tam dəstəklədiyini vurğulayıb. “Mən Ərturqutu tamamilə haqlı hesab edirəm. Məsələ ilə bağlı mən də təxminən bir həftə bundan əvvəl hay-küy saldım, fəryad etdim. Mən dəfələrlə bildirdim ki, Ə. Elçibəyin verdiyi müsahibələrin kontekstdən çıxarılıb mənə qarşı istifadə edilməsini tənqid etdim. Ə. Elçibəyin sağ ikən özünü, ölərkən də ruhunu incidən AXCP rəhbərliyi yenidən onu incitməməlidir. Bizə də başqa seçim imkanları qoymadıqları üçün biz də əks arqumentlər ortaya qoyduq. Amma Ərturqut bizə müraciət edirsə, təbii ki, onu nəzərə alacağıq. AXCP Elçibəy ailəsinin də üsyan püskürməsinə səbəb oldu. Buna təəssüf edirəm”-deyə R. Arifoğlu qeyd edib. ANN.Az