Bu şəhər və rayonların kənd evləri hostel kimi istifadəyə veriləcək

Onun sözlərinə görə,  Kiçik və Orta Biznesin İnkişafı Agentliyi, Dövlət Məşğulluq Agentliyi və Dövlət Turizm Agentliyi tərəfindən həyata keçirilən layihə çərçivəsində  2021-ci ilin noyabrından Lənkəran, Astara, Lerik, Şəki, Qax, Zaqatala, Balakən, Quba, Qusar və Xaçmaz rayonlarında da kənd evlərinin yaradılmasına başlanacaq. Artıq kənd evləri üçün standartlar hazırlanıb və bu evlərin  sahibləri üçün təlimlər təşkil olunacaq. 

"Azərbaycanın 22 rayonu və şəhər ətrafında kənd evləri sahibləri arasında sorğu keçirmişik. Təkmilləşdirmə proqramına əsasən qonaqların istismarına veriləcək ev nümunələri hazırlanır. Evlər  kənd evi, tətil evi və qonaq evi qruplarına bölünüb.  Təəssüf ki, vətəndaşlarımız bu evlər arasındakı fərqi hələlik tam başa düşmür. Agentlik olaraq düşünürük ki, bu proqram kənd evlərinin inkişafında böyük rol oynayacaq", - deyə Məmmədov bildirib.

 

Onun sözlərinə görə,  elə kənd evləri var ki, kifayət qədər turist qəbul etmək potensialına malikdir, amma bəzi nöqsanlar var. 

"Məsələn, Astaranın Sım kəndində qonaqların istifadəsinə vermək üçün artıq 3 ev nəzərdə tutulub. Tətil evi dedikdə ev sahibi boş evi və açarı qonağa təhvil verib gedəcək. Bu evi müvəqqəti ev yiyəsi olacaq qonaqlar öz istədikləri ərzaq və əşyalarla doldura bilər.

Biri də var kənd evi. Ola bilər ki, ailə ilə birgə eyni həyətdə yaşayasan, ola bilər ki, ailə eyni məhlədə, amma ayrı evdə yaşasın. Amma kənd evlərinin bəzi özəllikləri olacaq. Məsələn, ev sahibi dəmirçi ola bilər. Onun peşəsi, gördüyü işlər turistlərin marağını cəlb edə bilər. Yaxud, ev yiyəsi müxtəlif ev heyvanları saxlaya bilər. Tutaq ki, səhər öz inəyindən sağdığı təzə südü və ya arı pətəklərindən hazırladığı baldan qonağa təklif edə bilər. Yəni kənd evlərində qonaqlara orqanik məhsullar, eyni zamanda gündəlik yeməklər təklif edilə bilər", - deyə Məmmədov vurğulayıb.

 

Məmmədovun sözlərinə görə, kənd evlərinin yaradılması üzrə pilot layihə Azərbaycanın İsmayıllı rayonu ərazisində uğurla başa çatdırılıb.