“Rusiyanın Azərbaycanda yeni hərbi baza tikməsi real deyil”

Rusiya Müdafiə Nazirliyinin "Zvezda” telekanalının yaydığı məlumata görə, bu ölkə Qəbələ RLS-in əvəzində Azərbaycanda yeni hərbi baza tikməyə hazırlaşır.

Məlum olduğu kimi, 2012-ci ildə Rusiya Müdafiə Nazirliyi Qəbələ RLS-in izlədiyi əraziləri bundan sonra Armavirdə yeni quraşdırılan "Voronej-DM” tipli RLS-in izləyəcəyi haqda bəyanat verib. Bununla da Rusiyanın Azərbaycanda sonuncu hərbi obyekti bağlanıb və ölkəmizdə hərbi iştirakı sona çatıb. Qəbələ RLS-ə ehtiyacı olmadığını deyən Rusiyanın yenidən Azərbaycanda hərbi baza yaratması nə qədər realdır?

Modern.az saytının məsələ ilə bağlı suallarını hərbi ekspert Üzeyir Cəfərov cavablandırıb. O, Azərbaycan tərəfdən rəsmi açıqlama olmadığından belə bir stansiyanın yaradılmasını real hesab etmir:

"Məlumatın Rusiya Müdafiə Nazirliyinə yaxınlığı ilə tanınan "Zvezda” kanalı vasitəsilə yayılmasına baxmayaraq, Azərbaycanın Müdafiə Nazirliyi rəsmi açıqlama verənə qədər gözləməliyik. Ola bilər ki, informasiyada qeyri-dəqiqliklər var”.

Üzeyir Cəfərov onu da qeyd edib ki, sözügedən RLS-in yaradılması real olsa belə, Qəbələ RLS-in yerin verə bilməz: "Qəbələ RLS 6 min kilometr məsafədə bütün hədəfləri eyni zamanda izləyir və lazım olan vacib məlumatları Moskvaya çatdırırdı. "Voronej” tipli radiolokasiya stansiyaları bir qədər fərqlidir. Bu stansiyalar min kilometr məsafədə 500 hədəfi izləmək imkanına malikdir.

Əlbəttə, Rusiya 2012-ci ildə Qəbələ RLS-i tərk edəndə öz məsələlərini həll etdiklərini, ehtiyacları olmadığını bildirirdi. Bundan sonra dövriyyəyə yeni hərbi baza tikintisi xəbərinin buraxılması şübhə doğurur”.

Ekpsert Rusiya mənbələrinin də məsələyə inanmadıqlarını vurğulayıb: "Stansiya yenidən Azərbaycan ərazisində qurulsa, ən azı 2 ilə yaxın vaxt lazım gələcək. Bəzi hallarda stansiyanın qurulması 8-9 aya da başa gəlir. Amma bu son dərəcə dəqiq texnologiyadır, onun işə salınması asan məsələ deyil. Nəzərə alsaq ki, indi 2015-ci ilin ortalarıdır, onların bunu 2017-ci il üçün nəzərdə tutduqlarını b nəzərə alsaq vaxt baxımından müəyyən uyğunluq var.

Bu məsələ Rusiya mütəxəssisləri, hərbi ekspertləri tərəfindən maraqla qarşılansa da, onlar özü məlumatın səhihliyinə inanmırlar. Yəqin ki, yaxın zamanlarda Azərbaycanın müdafiə və xarici işlər nazirlikləri rəsmi açıqlama verəcəklər.  

Azərbaycanın milli təhlükəsizlik konsepsiyası və hərbi doktrinasında deyilir: "Xarici ölkə qoşunları və hərbi kontingenti Azərbaycan ərazisində yerləşdirilə bilməz. Ona icazə yalnız parlament səviyyəsində verilə bilər”. Nəzərə alaq ki, noyabr ayında parlamentin yeni üzvləri müəyyən olunacaq. Səslənən bir fikir real olsa belə, parlament işə başlayandan sonra müzakirə mövzusu ola bilər”.