“Xutor”, “Kubinka”, “Beşmərtəbə”nin sökülməsinə İcra hakimiyyətləri qərar verəcək

Bu barədə Modern.az saytına Dövlət Şəhərsalma və Arxitektura Komitəsinin Beynəıxalq əlaqələr və informasiya şöbəsindən məlumat verilib.

Bildirilib ki, hazırda Komitənin sifarişi əsasında "Bakıdövlətlayihə” İnstitutu tərəfindən Bakı şəhərinin  bütün inzibati ərazisini əhatə edən ərazidən istifadə və zonalaşdırma planının işlənilməsi üçün hazırlıq işləri aparılır. Bununla əlaqədar Komitə tərəfindən Respublikanın bütün aidiyyətı təşkilatlarına təklif və tövsiyyələrinin bildirilməsi üçün müraciət olunub.

""Böyük Bakının Regional İnkişaf Planı” ilə Bakının əsas sənaye zonasının Qaradağ rayonunda formalaşdırılması, Bakı ərazisində dəniz boyu zolağının bulvar kimi davam etdirilməsi və buradakı istehsalat, nəqliyyat və s. obyektlərin köçürülməsi (əsasən Qaradağ rayonuna) planlaşdırılır. 

2014-cü ildə Bakı Beynəlxalq Dəniz Limanının (Ələt qəsəbəsinin yaxınlığında) birinci mərhələsinin tikintisi başa çatdırılaraq istifadəyə verilib və burada işlər hələ də davam edir”,-deyə komitədən bildirilib.

Dövlət Şəhərsalma və Arxitektura Komitəsi onu da bəyan edib ki, Bakı şəhərində ərazilərin sökülməsi (sonradan burada yeni tikinti və abadlaşdırma tədbirlərin görülməsi daxil olmaqla), o cümlədən söküntü işlərinin nə zaman başlanılması barədə qərarların verilməsi müvafiq yerli icra hakimiyyətlərinin salahiyyətlərinə aiddir. 

""Xutor”, "Kubinka”, Nərimanov və Azərbaycan prospektləri arasındakı "Beşmərtəbə” adlanan ərazilərin sökülməsi barədə Dövlət Şəhərsalma və Arxitektura Komitəsinin Tikintilərin  Dövlət Reystrində qeydiyyata alınması üçün hələ ki məlumat daxil olmayıb”-deyə Komitədən Modern.az-a verilən açıqlamada qeyd olunub.