"Azərbaycan mediasının gücündən səmərəli istifadə olunmalıdır"

Beynəlxalq Mətbuat Mərkəzində "Səfir olsaydım, Azərbaycanı necə təbliğ edərdim" layihəsi çərçivəsində keçirilən dəyirmi masanın mövzusu bundan ibarətdir. 

ANN.Az xəbər verir ki, tədbirin təşkilatçısı "Demokratik İslahatçı Gənclər" İctimai Birliyinin İdarə Heyətinin rəhbəri Vüsalə Hüseynli Azərbaycanda mətbu sözün təsir gücünün yetəri qədər potensiala malik olmasından danışıb. O, qeyd edib ki, bu istiqamətdə aparılacaq yüksək təşkilatçılıq işləri səmərəli nəticənin əldə olunmasına səbəb olacaq: "Eləcə də Azərbaycan haqqında beynəlxalq aləmə daha dolğun və obyektiv məlumatların çatdırılmasına kömək göstərəcək. Biz bir qrup mətbuat nümayəndələri, gənclər, ictimaiyyət nümayəndələri ilə müxtəlif dəyirmi masalar keçirmişik, nəticədə irəli sürülən maraqlı təklifləri əlaqədar qurumlara təqdim etməyi nəzərdə tutmuşuq".

Vüsalə Hüseynli əlavə edib ki, Azərbaycan istər mədəniyyəti, turizmi, istərsə də tarixi, yaxud Dağlıq Qarabağ kimi ağrılı probleminin dünya ictimaiyyətinə çatdırılması istiqamətində ciddi işlər aparıb. Lakin bəzi beynəlxalq media qurumlarının Dağlıq Qarabağı işğalçı Ermənistanın ərazisi kimi göstərməsi mütamadi hal alıb: "Bu işğal barədə həqiqətdən uzaq mövzuların tirajlanması beynəlxalq ictimaiyyətdə bir çaşqınlıq, yalan informasiyaların ayaq açmasına şərait yaradır. Bu səbəbdən düşünürük ki, bizim media mənsubları özləri bu istiqamətdə vətəndaşlıq borclarını həyata keçirərək və istənilən vasitədən faydalanaraq bu problem barədə, eləcə də Azərbaycan həqiqətləri haqqında dünyaya düzgün informasiya ötürülməsi yollarını tapacaqlar".

Qeyd edək ki, layihənin maliyyə dəstəkçisi Prezident yanında Gənclər Fondudur.