Sabiq maliyyə nazirinə yeni vəzifə verildi

 

Sabiq nazir yeni vəzifəsi ilə bağlı Modern.az saytının suallarını cavablandırıb.

- Əvəz müəllim, yeni vəzifədə işə başladığınız doğrudurmu?

- Bəli doğrudur. Təhsil bizim gələcəyimizdir. Bu sahənin inkişafı perspektivimiz üçün yaxşı təminat deməkdir. Pratika, təhsil və elmin birgə nəticələri daha böyük effekt verir. Cənab prezident İlham Əliyevin rəhbərliyi altında ölkəmizdə böyük islahatlar gedir. Həm də  təhsildə  yeni, müasir idarəçilik sistemi yaranır.

Bu işlərdə biliyimi, bacarığımı tələbələrə çatdıra bilərəmsə bu, çox gözəl olar. Həm də müəllim sözü xalqımız tərəfindən həmişə böyük iftixarla  qiymətləndirilib.

- Bilmək olarmı, yeni işiniz nədən ibarətdir?

- Əlbəttə. Ümummilli lider Heydər Əliyevin məşhur bir kəlamı var: "Rəhbərlik etmək, yəni adamları öyrətmək və təcrübələndirmək üçün gərək mənəvi haqqın olsun”.

Azərbaycan Dövlət İqtisad Universiteti mənim məzun olduğum ali məktəb ocağıdır. Həm də adını çəkdiyim universitetlə, görkəmli alimlərlə daim əlaqələr qurmuşam. Həmçinin, 2008-ci ildə iqtisad elmləri doktoru adı almaq üçün dissertasiya müdafiə etmişəm. 40-dan çox elmi əsərin, bir neçə monoqrafiyanın müəllifiyəm.  
Yeni işimin nədən ibarət olmasına gəlincə, deyə bilərəm ki, Azərbaycan Dövlət İqtisad Universitetində kafedra müdiri vəzifəsini icra edəcəm. Təhsil Nazirliyi və universitet rəhbərliyi tərəfindən bu işə dəvət olundum. 3 kafedra- maliyyə, vergi və vergiqoyma, bank işi kafedraları birləşdirilərək, Maliyyə və maliyyə institutları kafedrası yaradılıb.
Mən də bu təklifi qəbul etdim. Kafedrada 11 elmlər doktoru və 33 elmlər namizədi fəaliyyət göstərir. 60-dan çox əməkdaşımız var.

- Yeni işlərinizdə sizə uğurlar arzulayırıq. Bəs yeni işinizlə bağlı hansı ümidləriniz var?

-Nümunəvi bir kafedra yaratmaq,  tanınmış universitetlərlə, eyni adlı kafedralarla əməkdaşlıq etmək,  universitetimizin imicini artırmaq, bakalavr və magistrlərə müasir səviyyədə təhsilin keyfiyyətini artırmaq, professor-müəllim heyətinin səviyyəsini yüksəltmək, universitetin ictimai-siyasi həyatında aktiv iştirak etmək...

Bir sözlə, universitetdə olduqca uğurlu, gözəl işlər gedir. Həmçinin, çalışacağam ki, rektorluğa yaxından kömək etməklə,  təhsil islahatlarının həyata keçirilməsində töhfəmizi əsirgəməyək.

Ölkəmizdə cənab prezident İlham Əliyevin rəhbərliyi altında böyük islahatlar gedir. Həm də təhsildə yeni, müasir idarəçilik sistemi yaranır. Bu islahatlardan kənarda qalmaq və iştirakçı olmamaq mümkün deyil.

***

Əvəz Ələkbərov 1991-ci ilin dekabrından 1992-ci ilin oktyabrına kimi Azərbaycan Respublikası Pensiya Fondu idarə heyətinin sədri işləyib. Oktyabr1992-ci ildən iyul 1999-cu ilə kimi Azərbaycan Respublikası Dövlət Sosial Müdafiə Fondunun sədri vəzifəsində çalışıb. İlk sosial sığorta haqqında qanunun müəlliflərindən biridir.

1999-cu ilin iyulundan 2006-cı ilin aprelinə kimi Azərbaycan Respublikasının maliyyə naziri olub. Respublikada iqtisadi siyasətin formalaşmasında, budcə-vergi, pul-kredit və sosial siyasətin təşəkkül tapmasında böyük səylər göstərib. O, çoxsaylı dövlət və hökümət komissiyalarının üzvü olub.

Azərbaycan–ABŞ dövlətlərarası iqtisadi komissiyanın həmsədri, Beynəlxalq Valyuta Fondu, İslam İnkişaf Bankı, Qara Dəniz Ticarət və İnkişaf Bankı, Avropa Yenidənqurma və Inkişaf Bankı və Asiya İnkişaf Bankının Azərbaycan üzrə müdiri olub. Azərbaycan və ABŞ iqtisadi əlaqələrinin qurulmasında işgüzar xidmətlər göstərib.
May 2000-ci ildən 2013-cü ilin iyununa qədər Yeni Azərbaycan Partiyası Siyasi Şurasının üzvü olub. Yeni Azərbaycan Partiyası Nəsimi rayon təşkilatının İdarə Heyətinin üzvüdür.