Qulu Məhərrəmlinin vəkilləri: “O müsahibədə iki iddia qaldırmaq üçün əsas yaradacaq ifadə yoxdur”

Vəkil Cavid Rzazadə ANN.Az-a açıqlamasında  "Azərbaycan Televiziya və Radio Verilişləri" QSC-nin sədri Arif Alışanovun AzTV-nin "Səhər" proqramının keçmiş rəhbəri Qulu Məhərrəmliyə qarşı qaldırdığı xüsusi qaydada iddiasına münasibət bildirib.

Onun sözlərinə görə, iddia ərizəsindəki dəlillərlə razı deyillər: "Bu səbəbdən də Qulu Məhərrəmliyə qarşı cinayət işinin açılma istəyini absurd hesab edirik. Hər halda məhkəmə birinci mərhələdə bu işin icraata qəbul edilib edilməməsi ilə bağlı qərar qəbul edəcək”. 

Hüquqşünasın sözlərinə görə, Arif Alışanovun bu iddia ilə bağlı şansı yoxdur: "Bu tək mənim fikrim deyil, digər vəkil həmkarlarımız da bu cür düşünürlər. Çünki Qulu müəllimin o müsahibədəki hər bir söz və detalını araşdırmışıq və belə qərara gəlmişik ki, orada heç bir təhqir və böhtan yoxdur”.  

 

Vəkil əlavə edib ki, Qulu Məhərrəmlinin məhkəməsi sabah saat 09:30-da Yasamal Rayon Məhkəməsində Azər Tağıyevin sədrliyi ilə keçiriləcək. 

Nəsimi Rayon Məhkəməsində Qulu Məhərrəmliyə qarşı qaldırılmış mülki qaydada iddia işində telejurnalistin hüquqlarını müdafiə edəcək digər vəkil Nicat Gözəlovun sözlərinə görə, məhkəməyə baxış təzə başladığı üçün əvvəlcə iddiaçının mövqeyini öyrənmək və bundan sonra onların iddialarına uyğun olaraq vəsatət qaldırmağı planlayır: "Çünki iddia ərizəsində göstərilənlər ayrıdır. Ola bilsin, məhkəmə prosesində başqa mövqedən çıxış edə bilərlər”.

Arif Alışanovun məhkəməyə müraciət eləməsinə səbəb Qulu Məhərrəmlinin bir neçə media qurumunda televiziyanın kütləvi yayıma başlamasının 60 illiyi ilə bağlı verdiyi açıqlamalardır. Jurnalist həmin açıqlamalarda AzTV-nin bugünkü fəaliyyətini bəyənmədiyini bildirib, bunu qurumun rəhbərinin qeyri-peşəkar olması və yaradıcı menecmenti bilməməsi ilə izah edib. Teletənqidçi bu barədə fikirlərini deyərkən sərt ifadələr işlədib.

 

Mövzu ilə əlaqədar "Azərbaycan Televiziya və Radio Verilişləri" QSC-nin mətbuat katibi Xatirə Qasımla əlaqə saxladıq. O, məhkəmə öncəsi hər hansı açıqlama verməyi məsləhət bilmədi. 

 

www.ann.az