“edu.ann.az” layihəsi çərçivəsində təqdimatlar daha 6 məktəbdə

Layihə çərçivəsində  Nərimanov rayon 291 saylı Ekologiya liseyində, Xətai rayon 86 saylı, Nizami rayon 62 saylı, Binəqədi rayon 283 saylı, Yasamal rayon 18 saylı və Nizami rayon 12 saylı tam orta məktəblərdə "edu.ann.az” elektron kitabxanasının təqdimatlar tədbirləri baş tutub. Sözü gedən məktəblərdə ümumilikdə 850 nəfərə yaxın şagird həmin elektron kitabxana barəsində məlumatlandırılıblar. 

Baş tutan tədbirlərin hamısında məktəblərin müəllim və şagird kollektivinə layihə haqqında məlumat verilib, onların sualları cavablandırılıb və təklifləri dəyərləndirilib.

Qeyd edək ki, Nizami rayon 12 saylı tam orta məktəbdə "edu.ann.az” layihəsi çərçivəsində baş tutan təqdimat həmin məktəbin rəhbərliyinin təklifi ilə keçirilən sayca ikinci tədbirdir.

Layihənin məqsədi şagirdlərin sinifdən xaric oxu vasitələri ilə təmin olunması və ədəbi əsərlərin qısa bir zamanda, kitabxanaya getmədən də əldə edilməsidir.

Nəzərinizə çatdırırıq ki, "edu.ann.az” elektron kitabxana layihəsi çərçivəsində 8 aprel 2016-cı il tarixindən etibarən başlanan təqdimatlarda Bakı şəhərinin ümumilikdə 21 ümumtəhsil məktəbində 2500 nəfərə yaxın müəllim və şagirdlər iştirak ediblər.