"Bu cür ayrı-seçkilik islamda gedən proseslərin bütövlüyünə zərbə vurur"

ANN.Az xəbər verir ki, bunu jurnalistlərə açıqlamasında Dini Qurumlarla İş üzrə Dövlət Komitəsinin sədri Mübariz Qurbanlı bildirib.

Komitə sədrinin sözlərinə görə, Türkiyədə dini bayramların bütün islam ölkələrində eyni gündə keçirilməsi ilə bağlı bu yaxınlarda böyük bir toplantı keçirilib, həmin tədbirdə məsələ ilə bağlı geniş müzakirələr aparılıb:

"Ümumi səsvermə nəticəsində belə razılığa gəlinib ki, islam ölkələrində dini bayramlar və dini mərasimlər eyni gündə keçirilsin və vahid təqvim tətbiq edilsin. Bunun üzərində iş gedir. Burada əsasən aparıcı islam ölkələrinin bununla bağlı atacağı addımlar olduqca önəmlidir. Bu tədbirdə ümumi razılığa gəlinib ki, İslam Əməkdaşlıq Təşkilatı çərçivəsində məsələ müzakirə olunsun və bununla əlaqədar İslam Əməkdaşlıq Təşkilatı çərçivəsində qətnamə qəbul edilsin".

"Bu məsələ ilə əlaqədar Azərbaycan öz mövqeyi ondan ibarətdir ki, islam dünyasında vahid təqvim sistemi tətbiq olunmalıdır. Burada hər hansı ayrı-seçkilik və parçalanma olmamalıdır. Çünki bu cür ayrı-seçkilik və təqvim fərqləri bütövlükdə islamda gedən proseslərin bütövlüyünə zərbə vurur. Ona görə də biz islam dünyasında dini bayramlar və dini ayinlərlə bağlı vahid təqvim sisteminin tətbiqinə tərəfdarıq. Amma bu, müzakirə mövzusudur. Müzakirə davam edir və  İslam Əməkdaşlıq Təşkilatı çərçivəsində də müzakirələr olduqda Azərbaycan öz mövqeyini bildirəcək" - deyə M.Qurbanlı əlavə edib.

Qeyd edək ki, bu gün Gənclər arasında milli-mənəvi  dəyərlərin təbliğ edilməsi və dini radilakizmə qarşı mübarizə məqsədi ilə Azərbaycan Respublikası Gənclər və İdman Nazirliyi ilə Dini Qurumlarla İş üzrə Dövlət Komitəsinin 2016-cı il üçün birgə Tədbirlər Planına uyğun olaraq, "Multikultral dəyərlər və tolerantlıq Azərbaycanın ən qiymətli sərvətlərindəndir" mövzusunda konfrans keçirilib.

Orxan Aslanlı