AMEA-da magistratura pilləsində təhsillə bağlı fəaliyyət planı müzakirə olundu

AMEA İctimaiyyətlə Əlaqələr şöbəsindən ANN.Az-a verilən məlumata görə, tədbiri giriş sözü ilə AMEA Təhsil şöbəsinin rəisi, kimya üzrə fəlsəfə doktoru Ömər Gülalov açaraq Akademiyanın magistratura pilləsində təhsillə bağlı fəaliyyət planı barədə məlumat verib. Şöbə rəisi vurğulayıb ki, bu il magistratura pilləsinə qəbulda ən böyük rəqabət Akademiyada müşahidə olunub: "Son illər AMEA-da elmi fəaliyyətin səmərəliliyinin daha da artırılması, Akademiyada aparılan fundamental və tətbiqi araşdırmaların nəticələrinin sosial-iqtisadi və digər sahələrdə tətbiqinin təmin edilməsi, elmi kadrlardan düzgün istifadə edilməsi məqsədilə müəyyən tədbirlər görülür. AMEA-nın qarşısına qoyduğu hədəflər sırasında elmtutumlu sahələrin inkişaf etdirilməsi mühüm əhəmiyyət kəsb edir. Əminliklə deyə bilərik ki, Akademiyanın potensialından istifadə daha savadlı mütəxəssislərin hazırlanmasına kömək edəcək. Biz Akademiyada magistratura təhsilinin keyfiyyətinin daha da artırılması üçün bu cür görüşləri mütəmadi şəkildə keçirəcəyik”. Ömər Gülalov vurğulayıb ki, yaxın günlərdə AMEA prezidenti, akademik Akif Əlizadənin magistrlarla görüşü gözlənilir.

Sonra AMEA-nın Elmi analitik şöbəsinin rəis müavini, texnika üzrə fəlsəfə doktoru Hüseyn Hüseynov çıxış edərək, 2016-2017-ci tədris ilində Akademiyada magistratura pilləsinə 19 ixtisas üzrə 56 nəfərin qəbul olunduğunu bildirib. Tədris planı və dərs saatları barədə iştirakçıları məlumatlandıran Hüseyn Hüseynov tədbir iştirakçılarının bir sıra suallarını cavablandıraraq qeyd edib ki, AMEA-da magistratura təhsilini həyata keçirən elmi müəssisələr Elm və Təhsil İdarəsi tərəfindən bütün normativ sənədlərlə təmin olunacaqlar.

Sonda Təhsil şöbəsinin rəisi Ömər Gülalov iclas iştirakçılarına yeni tədris ilində uğurlar arzulayıb və magistratura təhsilinin təşkilinin yüksək səviyyədə olması üçün AMEA rəhbərliyinin bütün zəruri addımlar atacağını bildirib.