BANM-də Xonça Festivalı

Novruz bayramının ölkəmizdə, xüsusilə gənclər arasında geniş qeyd edilmə ənənəsi mövcuddur. Səməni və boyanmış yumurtalar Novruzun xüsusi simvollarıdır. Eyni zamanda, yumurta döyüşdürmək kimi bir adətimiz də var. BANM-in tələbələri və müəllim kollektivi Novruzu birgə qeyd edərək onu hazırlıq kursunun ən yaddaqalan xatirəsinə çevirdilər.

Festival çərçivəsində üç müsabiqə təşkil olunmuşdur: Xonça müsabiqəsi, yumurta döyüşü və şirniyyatın sürətlə yeyilməsi. Festivalda tələbələr tərəfindən bəzədilmiş rəmzi məna daşıyan 20 xonça təqdim edilmişdir. Xonçalara düzülmüş şirniyyatlar və səmənilər insanların könlünə yaz, təzəlik ab-havası gətirməklə tədbirdə xüsusi bayram əhval-ruhiyyəsi yaratmışdır.

Xonça müsabiqəsində ən zövqlü tərtibata görə "İngilis N2” qrupu qələbə kubokunu qazanmışdır. Yumurta döyüşü müsabiqəsinin qalibi BANM-in "Neft-Qaz Mühəndisliyi” ixtisası üzrə təhsil alan 1-ci kurs tələbəsi Asəf Səfərov oldu.

 Şirniyyatların sürətlə yeyilməsi müsabiqəsində Ali Məktəbin "Kimya Mühəndisliyi” ixtisası üzrə təhsil alan 1-ci kurs tələbəsi Fərid Tağıyev qalib gəldi. BANM-in rektoru Elmar Qasımov qalib gəlmiş tələbələri xüsusi qeyd edərək bütün festival iştirakçılarını Novruz bayramı münasibəti ilə təbrik etdi.