"Gənclik" parkı xarabalığa çevrilir - FOTO

Parkdakı çoxillik şam, küknar ağacları quruyur. Sakinlər vaxtı ilə paytaxtın ən iri parkı hesab edilən bağın tamamilə məhv olacağından narahatdır. Çünki park və bağların özəlləşdirilərək yerində çoxmərtəbəli binaların tikintisi adətən bu üsulla mümkün olur, ərazi xarabalığa çevrilir və satılır.

anews.az virtualaz-a istinadən xəbər verir ki, sakinlərdən biri - Xanım Quliyeva deyir ki, son iki ilə qədər Bakı Şəhər İcra Hakimiyyətindən tutmuş Milli Məclisə qədər bütün qurumlara müraciət ediblər. Bakı Şəhər İcra Hakimiyyətindən tezliklə abadlaşdırılma işlərinə başlanılacağına dair cavab gələndən sonra şikayətləri dayandırıblar. O vaxtdan indiyədək parkın abadlaşdırılacağı günü gözləyirlər.

X.Quliyeva əlavə edir ki, vaxtilə ərazidə zeytun və küknar meşəsi olub. Amma parkla bərabər meşə də məhv olub. İndi barmaqla sayılacaq qədər zeytun və küknar ağacı var. Yağışın ümidinə qalan bu ağaclar da gec-tez məhv olacaq.

Parkının ən hündür hissəsindən dəniz görünür. Vaxtilə burda yay klubları, qaya parçalarından tikilmiş yeraltı restoranlar olub. İndi isə taxtadan tikilmiş "besedka"lar qalıb. Amma dəniz mənzərəsi və yağıllıq səbəbindən hətta günün qızmar vaxtında belə burda istirahətə gələnlər olur.

Aydın Əliyev deyir ki, nəvələrinin səs-küyündən bura istirahətə gəlir. Amma ətrafa atılan tullantıların üfunətindən dincəlmək istəyi gözündə qalıb. A.Əliyevin fikrincə, tullantıları qəsdən park boyu səpirlər ki, heç kim bura gəlmək istəməsin.

Parkın yuxarı hissəsinə qalxmaq üçün pilləkənlərlə uzun yol qət etmək lazımdır. Doğrudan da, maraqlıdır, zibil atmaq üçün kim bu qədər məsafəni qət edir? Sakinlər də deyirlər ki, tullantılar yalnız gecə saatlarında atılır, çünki yaylı-qışlı hava qaralana qədər parkda istirahət edənlər olur.

Parkda dincələnən sakinlərdən biri də ərazinin qəsdən bu vəziyyətə salındığı iddia edir. "Əvvəllər burda restoran vardı, əxlaqsızlıq yuvasına çevrilmişdi. Sakinlərin şikayətindən sonra obyekti bağladılar. Yəqin ki, yenə də restoran, çayxana açmaq istəyirlər. Ya da ərazini gözaltı edənlər var. 

Yoxsa ki, parkın unudulması, məhv olması üçün belə ciddi-cəhdlə çalışmazlar", - sakin deyir.

Parkda sünü göl olub, indi gölün yerində bataqlıq qalıb. Uşaq yelləncəklərindən isə paslanmış dəmir parçaları xatirə qalıb.

Parkın girəcəyində uşaqlar üçün balaca əyləncə yeri düzəldilib, iki-üç maşın və bir neçə velosiped qoyulub. Amma elə həmin yerdə hin də düzəldilib, kimi toyuq-cücə, kimi də quş saxlayır. Hinin düz arxasındakı böyük ərazidə çörək qalırlar, məişət tullantıları toplanıb. Görünür, toyuq-cücə elə bu tullantı ilə qidalanır.

Onu da qeyd edək ki, park Xətai Rayon İcra Hakimiyyətinin balansındadır. Bulvardan sonra ən böyük ərazisi olan parkın xarabalığa çevrilməsi, görünür, kimlərəsə sərf edir. Xarabalığa çevrilərək satılan digər parklar kimi...