​Lotu Qulini Babək, Koroğlu kimi sevən kimlərdir? – Rəylər

Adətən, insanlar mifləşdirməyi sevirlər.
 
Bu sözləri Teleqraf.com-a açıqlamasında avtoritetlərin cəmiyyətdə rəğbətlə qarşılanmasına münasibət bildirən psixoloq Vəfa Rəşidova deyib.
 
Psixoloqun sözlərinə görə, hadisənin, əməlin, şəxsiyyətə bağlı hərəkətin kökündə həqiqət varsa, mifləşdirmə mümkündür: "Təəssüf ki, çox hallarda insanlar adi şeyləri, bəzən də neqativ hadisələri ilahiləşdirməyə meyl göstərirlər. Nəyi və kimi mifləşdirdiklərinin fərqinə varmırlar. Bu, çox qəribədir. Doğrusu, bəzən insanların bu qədər bəsit düşündüyünə heyrət edirəm.
 
Məsələnin sosio-psixoloji tərəfi odur ki, cəmiyyətdə özünə inamsız insanlar daha çoxdur. Kütlənin hansısa nüfuzlu, məşhur şəxsiyyəti bütləşdirdiyini görüb, o da kütləyə qoşulur. Kriminal avtoritetlər də bu sıradandır. Bilmirəm, belələrinin cəmiyyətə nə faydası dəyib?.. Kitab yazıb, jurnal çıxarıb, insanları maarifləndiriblər? Bəlkə, 5 nəfərin həyatını qutarıb, şəhid olub, əsgər gediblər?”
 
Psixoloqun sözlərinə görə, dünyagörüşü məhdud olan, özünə inanmayan insan həmişə kənarda nüfuzlu avtoritet axtarır və onu "tapır”...
 
Psixoloq Babək, Koroğlu kimi əsl qəhrəmanların kriminal avtoritetlərlə əvəzlənməsinə mənfi tendensiya kimi yanaşdığını deyib: "Bəlkə də Babəkin ruhu sızlayır… Eyni zamanda bunu cəmiyyətin çatışmazlığı kimi də dəyərləndirə bilərik. Yəni cəmiyyətdə model göstərilən şəxslər bu dərəcədə deformasiyaya uğtrayıb… Bu, gənclərimiz üçün çox təhlükəlidir. Gənclər adətən, nümunə hesab olunan, sevilən, rəğbət bəslənən şəxslərə bənzəməyə çalışırlar”.
 
Şair Aqşin Yenisey oğru dünyasının adamlarının cəmiyyətdə Koroğlu, Robin Qud kimi qəbul edilməsini əxlaqi və ictimai şüur pozuntusu sayır: "Əxlaqi pozğunluqdur, ona görə ki, bizim xalqın əxlaq normalarını yaradan islam dininə görə oğurluq, oğru olmaq ən böyük günahdır, amma cəmiyyətimizdə oğru dünyasının əsas heyranları dindar gənclərdir. İctimai pozğunluqdur ona görə ki, oğrubaşıları iddia edirlər, siyasətlə işimiz yoxdur, biz ədalət axtarırıq. Ədalət siyasətin təməl prinsipidir.
 
Oğrulara, mafiozlara pərəstiş təkcə biz Qafqaz xalqlarına xas deyil. Latın Amerikasında da xalq banda başçıları üçün sino gedir. Və bu o qitədir ki, etnoqraflar onu "Dünyanın ən mənəviyyatsız qitəsi" adlandırırlar”.
 
Məhbəs həyatı görmüş şair Mahir Mehdi isə bildirib ki, cəmiyyətdə problemlər müəyyən həddə çatanda millət özünə həmişə qəhrəmanlar uydurur: "Real bir adamı götürüb, onu sirr pərdərinə bürüyür, ona əzəmət çaları əlavə edirlər. Cinayətkar aləmin, oğru dünyasının adamları haqq-ədalət carçıları kimi ən yararlı, əvəzolunmaz vasitədilər. Əslində, cəmiyyətə qəhrəman kimi sırınan o adamlar "millət, ədalət" deyə-deyə özləri üçün çalışan cibgirdən, qulaqkəsəndən başqa bir şey deyillər. Oğrulara, quldurlara dəyər verib, başa çıxardığımıza görə, bizim qəhrəmanlıqlarımız Qaçaq Nəbi səviyyəsindədi”.
 
Qeyd edək ki, kriminal aləmdə tanınmış Lotu Qulinin azadlığa çıxmasından sonra onun və digər avtoritetlər ətrafındakı müzakirələr uzun müddətdir səngimək bilmir.
 
Müəllif: Şəfiqə Nazimqızı
www.anews.az