Elçin Quliyev: "Ölkənin generalıyam, məni siqaret satanlara görə tutmusunuz"

 

Anews.az lent.az-a istinadən xəbər verir ki, Bakı Hərbi Məhkəməsində hakim Elbəy Allahverdiyevin sədrliyi ilə baş tutan prosesdə general Elçin Quliyevin son sözlə çıxış edib. Jurnalistlər məhkəməyə buraxılmayıb.

General Elçin Quliyev çıxışında kəskin danışmayıb: "Məni  siqaret satanlara görə tutub gətirmisiniz. Mənim nə qədər naliyyətlərim olub. Gəncə, "Sovetski" hadisələrində ciddi xidmətlərim olub. Güclü əməliyyatlarım olub, hamısı da uğurla nəticələnib. Bu, belə olmaz. Mən ölkənin generalıyam. Heç bir günahım yoxdur. Bəraət istəyirəm".

 

O, çıxışında keçmiş rəhbərinin adını bir dəfə də çəkməyib.

Prosesdə Azər Mehdiyev son sözlə çıxış edərək günahsız olduğunu deyib: "Məni Maqsud Mahmudovun işinə görə tutublar. Həmin epizodda mənim günahım yoxdur. Barəmdə bəraət hökmü çıxarılmalıdır".

Daha sonra hakimlər kollegiyası hökm qəbul etmək üçün müşavirəyə çıxıb.

Hökmün elanı qeyri-müəyyən vaxta qədər təxirə salınıb.

Qeyd edək ki, prokuror çıxışında Elçin Quliyevin 15 il, Azər Mehdiyevin 13 il müddətinə azadlıqdan məhrum edilməsini istəyib. Eyni zamanda onların hərbi rütbədən məhrum olunması və əmlaklarının müsadirə edilməsi də təklif edilib.

Prokuror Dövlət Təhlükəsizlik Xidmətinin təqsirləndirilən Elçin Quliyevə qarşı qaldırdığı 7 milyon manatlıq mülki iddiasının, həmçinin cinayət işində adı keçən zərərçəkmişlərində mülki iddiasının təmin olunmasını tələb edib.

 

Elçin Quliyev MTN-in Antiterror Mərkəzinin rəisi olub. MTN-lə bağlı həbslər başlayanda o, adı çəkilən qurumun akademiyasına kafedra rəisi təyin edilib. Daha sonra cinayət işi üzrə həbs edilib.