Toyu yasa çevirən Bakı “avtoş”ları - ŞOK VİDEO

“Qəhrəmanlar” təhlükəli manevrlərlə ölümlə “rəqs edirlər”.

Bu kadrlar Yasamal rayonunda, “İnşaatçılar” metrostansiyasının yaxınlığındakı “Ağ çiçəyim” şadlıq evinin qarşısında çəkilib. Özü də “avtoş”luq edənlər (daha doğrusu, toyu yasa çevirməyə çalışanlar) toya gələn gənclərdir.

Avtosfer.az-ın məlumatına görə, bu video Youtube sosial şəbəkəsinə Babək Əliyev adlı şəxs tərəfindən bu il yerləşdirilib. Kadrlardan görünür ki, bəy-gəlin maşını şadlıq evinə yenicə çatıb.

Onları müşayiət edən ağ və qara rəngli “VAZ-2107” markalı avtomobillər yolda təhlükəli vəziyyət yaradırlar.

Onsuz da şadlıq evinin qarşısındakı maşınların əlindən yol daralıb. Bu avtoxuliqanların hərəkətləri isə yolu daha da pis vəziyyətə salır. Öz yolu ilə gedən avtomobillər bu iki üzqarasına görə təhlükəli vəziyyətlə – qəza şəraiti ilə üzləşirlər. Onların “qəhrəmanlığı” nəticəsində ətrafdakı insanlar narahat olurlar, sonra hamı “tamaşaya” baxmağa başlayır. Bundan həvəslənən “avtoşlar” yolun əksinə hərəkət edərək daha təhlükəli manevrlərlə ölümlə rəqs edirlər.

Görəsən, bunlar anlamırlarmı ki, toy günü bədbəxtçilik baş verə bilər və toyu yasa döndərə bilərlər? Maraqlıdır ki, “07”lərin bu hərəkətləri ətrafdakı “avtoş”ları da həvəsləndirir və az sonra ağ rəngli “KİA” markalı avtomobil də onlara qoşulmağa çalışır. Lakin artıq şou başa çatmışdı.

Bu kadrlar həvəskar operator tərəfindən çəkilib və bir az uzaqdan lentə alındığı üçün avtomobillərdən yalnız bəy-gəlin maşınının və ağ rəngli “07”nin dövlət nömrə nişanlarını görmək mümkündür. Bəy-gəlin maşınının nömrəsi 90 NG 584, ağ rəngli “07”nin nömrəsi isə 10 KK 069-dur.

İnanırıq ki, Dövlət Yol Polisi İdarəsi bu xuliqanları artıq cəzalandırıb. Belə deyilsə, bu kadrlar onların cəzalandırılması və bu barədə ictimaiyyətə məlumat verilməsi üçün böyük əsas sayıla bilər.

ANN.Az